Jekeshelendirý: Qansha kásiporyn satyldy

ASTANA. QazAqparat - Úkimettiń búgingi otyrysynda QR Qarjy mınıstri Baqyt Sultanov jekeshelendirý sharalary boıynsha esep berdi, dep xabarlaıdy QazAqparat tilshisi.

Mınıstrdiń sózine qaraǵanda, jekeshelendirýdiń keshendi jospary 904 nysandy qamtıdy. «Atalǵan nysandardyń 876-sy týraly tolyq aqparat gosreestr.kz saıtyna shyǵaryldy. Bul tizimge qaıta qurylatyn jáne qaıta tirkeýden ótetin 28 respýblıkalyq menshik nysany engizilgen joq. Olar - apattar medıtsınasy jáne temirjol gospıtaldary. Biraq Ekonomıkany jańǵyrtý máseleleri jónindegi memlekettik komıssııanyń sheshimine sáıkes, atalǵan aktsıonerlik qoǵamdar qaıta qurylýǵa jatady», - dep atap kórsetti B.Sultanov.

Onyń málimetine sáıkes, eki jyldyń ishinde keshendi josparǵa kiretin 476 kásiporyn saýda-sattyqqa shyǵarylyp, 367-si satyldy. Odan túsken qarjynyń kólemi 164 mlrd teńgeni qurady. «Budan basqa, 255 nysan qaıta uıymdastyrý jáne taratý satysynda tur. Jalpy, qaıta uıymdastyrylatyn jáne taratylatyn nysandardy esepke alǵanda jekeshelendirý boıynsha keshendi jospardyń oryndalýy 71 protsent deńgeıinde», - deıdi Qarjy mınıstri.

Aıta keteıik, otyrys barysynda QR Premer-Mınıstri Baqytjan Saǵyntaev jekeshelendirýden túsken qyrýar qarjyny Ulttyq qorǵa ýaqytynda aýdarýdy tapsyrdy.  Al QR Ulttyq ekonomıka mınıstri Tımýr Súleımenov ınventarızatsııadan keıin jańa kásiporyndardyń sańyraýqulaqtaı qaptap ketetini úshin sóz estidi.