Jekeshelendirý: Bıyl 123 nysan satylady

ASTANA. QazAqparat - Bıyl Jekeshelendirýdiń keshendi josparyna kirgen 123 nysan satylady. Bul týraly búgin Úkimet úıinde ótken baspasóz máslıhatynda QR Qarjy mınıstri Álıhan Smaıylov aıtty, dep habarlaıdy QazAqparat tilshisi.

«Búgingi kúni Jekeshelendirýdiń keshendi josparyna kirgen 898 nysannyń 530-y jospar júzege asqan ýaqyttan bastap satýǵa shyǵaryldy. Onyń 473-i 470 mlrd teńge somasyna satyldy. Atap aıtqanda respýblıkalyq menshiktegi 47 nysan 44 mlrd teńgege, kommýnaldyq menshiktegi 246 nysan 64 mlrd teńgege, ulttyq holdıngtiń 102 nysany 356 mlrd teńgege, áleýmettik kásipkerlik korporatsııanyń 78 nysany 6 mlrd teńgege saýdalandy», - dedi Á.Smaıylov.

Onyń aıtýynsha, ІRO-ǵa shyǵarylǵan «Qazatomónerkásip» UAK» AQ aktsııalarynyń 15 paıyzy boıynsha saýda-sattyq AHQO bırjasynda jáne London qor bırjasynda ótken. Aktsııalardy 49 sheteldik jáne 17 otandyq zańdy tulǵa, sondaı-aq 2700 Qazaqstan Respýblıkasynyń azamaty satyp alǵan. Mámilelerdiń jalpy somasy 168 mlrd teńgeni nemese 451 mln AQSh dollaryn quraǵan.

«Munan basqa, 280 nysan qaıta qurýǵa jáne taratýǵa jiberiledi. Onyń 170-i qaıta uıymdastyrylyp, joıyldy. Osylaısha, Jekeshelendirýdiń keshendi josparyn oryndaý 84 paıyzdy qurady. Jekeshelendirýdiń keshendi jospary túgendeý nátıjeleri boıynsha anyqtalǵan nysandarmen birtindep tolyqtyrylatynyn atap ótkim keledi. 2018 jyldyń qarasha aıynda qosymsha 48 nysan engizildi. Aǵymdaǵy jyly keshendi josparǵa kirgen 123 nysandy satýdy aıaqtaý josparlanyp otyr»,- dedi ol.