Jekemenshik mektepterge aýysatyn oqýshylar qatary artyp keledi
«Memlekettik tapsyrysty ornalastyrý mehanızmin qaıta qaraýǵa jáne qosymsha qajettilikke qatysty Memleket basshysynyń tapsyrmasyna sáıkes Oqý-aǵartý mınıstri buıryǵynyń jobasy ázirlendi. Jobada derbestendirilgen qarjylandyrý kózdelgen. Bul bilim berý tapsyrysyn bilim alýshynyń ataanasyna nemese ózge de zańdy ókiline balasyn oqytýǵa bólinetin bıýdjet qarajatyn qadaǵalaýǵa múmkindik beredi. Qazirgi kezde memlekettik tapsyrys boıynsha 677 jekemenshik mektepte 251,3 myń oqýshy bilim alýda. Alaıda, jyl saıyn jańa oqý jylynyń basynda jekemenshik mektepterdiń sany men olardaǵy oqýshy kontıngentiniń ósýine baılanysty qarjy tapshylyǵy bar (2022 jyly – 174 oqýshy orny bar 527 jeke uıym, 2023 jyly – 228 oqýshy orny bar 616 jeke uıym, 2024 jyly – 259 oqýshy orny bar 677 jeke uıym). Osyǵan oraı jekemenshik mektepterde memlekettik tapsyrys shyǵystarynyń kólemin ulǵaıtýǵa qosymsha qarajat respýblıkalyq bıýdjetti naqtylaý jáne túzetý kezinde qarastyrylatyn bolady», - dedi Úkimet basshysynyń orynbasary jaýabynda.
Onyń dereginshe, bıyldyń ózinde de jekemenshik mektepterde memlekettik tapsyrysty ornalastyrýǵa qosymsha 66,7 mlrd teńge qajettiligi anyqtaldy. Atalǵan qarajat bıýdjetti naqtylaý kezinde zańnamada belgilengen tártippen qarastyrylmaq.
«Oqý-aǵartý mınıstrligimen júrgizilgen taldaýdyń nátıjesinde 2023-2024 oqý jylynda memlekettik mektepterden jekemenshik mektepterge 71 myń oqýshynyń kóshýi anyqtaldy. Óz kezeginde buryn memlekettik mektepterde oqyǵan osy oqýshylar úshin qarajat 2023-2025 jyldarǵa arnalǵan jalpy sıpattaǵy transfertter men sýbventsııalar túrinde jergilikti bıýdjetter bazasyna berilgen. Aldaǵy úsh jylǵa qarjylandyrý kólemi oqýshylardyń belgili bir bóliginiń memlekettik mektepterden jekemenshik mektepterge kóshýi jáne «aqshanyń oqýshynyń sońynan erýi» qaǵıdatyn eskere otyryp eseptelindi. Osyǵan oraı 2025-2027 jyldarǵa arnalǵan respýblıkalyq bıýdjet týraly Zań jobasynda jekemenshik mektepterde memlekettik tapsyrysty ornalastyrýǵa arnalǵan shyǵystardy jergilikti atqarýshy organdarǵa aǵymdaǵy nysanaly transfertter arqyly jiberý kózdelgen»,- dedi ol.
Vıtse-premerdiń atap ótýinshe, bul shara eger oqýshylar memlekettik mektepterden jekemenshik mektepterge aýystyrylatyn jaǵdaıda eki ret qarjylandyrý táýekelin boldyrmaý maqsatynda jáne qarajattyń ádil bólinýin qamtamasyz etýge múmkindik beredi.
«Zań jobasynda jekemenshik orta bilim berý uıymdarynda memlekettik bilim berý tapsyrysyn ornalastyrýǵa 416,3 mlrd teńge (179 924 oqýshy orny bar 528 jeke uıym) aǵymdaǵy nysanaly transfertter túrinde qarastyrylǵan», - dedi Tamara Dúısenova.
Osyǵan deıin kelesi jyldan bastap mektepterde stomatologııa kabınetteri ashylatyny týraly habarladyq.