Jekemenshik klınıkaǵa qaralýshynyń barlyǵyna teń dárejede qyzmet kórsetilýi tıis - Ajar Ǵınııat

ASTANA. QazAqparat – Densaýlyq saqtaý mınıstri Ajar Ǵınııat keıbir jekemenshik klınıkalardyń naýqastarǵa qatysty qarym-qatynasy týraly pikir bildirdi, dep habarlaıdy QazAqparat tilshisi.

Búgin Parlament Májilisinde tilshiler mınıstrden jekemenshik klınıkalardyń áreketteri jaıynda surady.

«Mindetti áleýmettik medıtsınalyq saqtandyrý (MÁMS) boıynsha medıtsınalyq kómek alýǵa baratyndar mamandarǵa bir apta buryn jazylyp, óziniń kezegin kútýi kerek. Al, bekitilgen patsıentter, ıaǵnı iri ulttyq kompanııalarda jumys isteıtinder dárigerdiń qabyldaýyna kez kelgen ýaqytta bara alady. Bul áreketter qanshalyqty zańdy?» - dep surady tilshiler.

Óz kezeginde A. Ǵınııat kóterilip otyrǵan osy máseleni qarastyrý kerek ekenin aıtty.

«Shynymen de, bul máseleni durys kóterip otyrsyzdar. Sizderge de atalǵan kompanııalardyń ókilderine sııaqty teń dárejede qyzmet kórsetilýi tıis. Sebebi, sizder úshin de saqtandyrý jarnasy tólenip jatyr. Sondyqtan, Densaýlyq saqtaý mınıstrligine resmı shaǵym túsirińizder. Osy oraıda, biz atalǵan jaıttardy memlekettik tapsyrysty bólý kezinde eskeretin bolamyz», - dedi mınıstr.

Aıta keteıik, MÁMS arqyly kóptegen qymbat degen medıtsınalyq qyzmetterdi tegin alýǵa bolady.