Jeke úı salynatyn 50 myńnan astam jer telimine ınjenerlik-kommýnıkatsııalyq jeliler tartylmaq

NUR-SULTAN. QazAqparat – Bıyl Qazaqstanda jeke turǵyn úı qurylysyn salýǵa arnalǵan 50 myńnan astam jer telimine ınjenerlik-kommýnıkatsııalyq jeliler júrgizý josparlanyp otyr. Bul týraly Indýstrııa jáne ınfraqurylymdyq damý vıtse-mınıstri Erkebulan Daýylbaev Qostanaı oblysyna jasaǵan jumys sapary barysynda málimdedi, dep habarlaıdy QazAqparat.

«Nurly jer» memlekettik baǵdarlamasy aıasynda bıyl ınjenerlik-kommýnıkatsııalyq ınfraqurylym qurylysy boıynsha 375 joba júzege asyrylmaq. Atalǵan joba bolashaqta turǵyn úı qurylysyn júrgizýge baǵyttalǵan. Ol úshin qazynadan 119 mlrd teńge qarastyrylǵan. Onyń ishinde 54 mlrd teńgeni quraıtyn 180 joba jeke turǵyn úı qurylysyn júrgizýge arnalǵan 50 257 jer telimine kommýnıkatsııalyq jeliler júrgizýge arnalǵan jobalar sanatynda. Búginde osy tarapta Qostanaı oblysynda 12 joba júzege asyrylyp jatyr. Bul – qaladaǵy jeke turǵyn úı salýǵa arnalǵan 1 252 jer telimine qajetti jeliler júrgizýdi qamtamasyz etýge arnalǵan», – dep atap ótti Erkebulan Daýylbaev.

Onyń aıtýynsha, Arqalyq qalasyndaǵy 7-shaǵyn aýdandaǵy 172 jer teliminde kommýnıkatsııalyq jeliler qurylysy bastalǵan. Qurylys jumystary bıyl aıaqtalýy kerek. Al, jeke turǵyn úı qurylysyn júrgizýge arnalǵan jer telimderi arnaıy kezekpen beriledi.

Jalpy alǵanda, 2022 jyly Qostanaı oblysynda 475 sharshy metr turǵyn úı qurylysyn júrgizý josparlanǵan. Onyń 175 myń sharshy metri jeke úı qurylysyna tıesili.

Sonymen qatar, vıtse-mınıstr jeke turǵyn úı qurylysyn salýǵa arnalǵan alańdardy tıisti jelilermen qamtý jumystary elimizdiń ózge de qalalarynda iske asyrý kózdelip otyrǵandyǵyn jetkizdi. Al, aýyldyq eldi meken aýmaǵynda ornalasqan jer telimderin kommýnıkatsııalyq jelilermen qamtamasyz etý ázirge qarastyrylmaǵan.