Jeke tulǵanyń bankrottyǵy týraly zańnyń qandastarǵa qatysy bar ma

NUR-SULTAN. QazAqparat – Memlekettik kirister komıteti Jeke tulǵanyń bankrottyǵy týraly zań jobasyn kúshine engennen keıin de jetildirýdi usynyp otyr, dep habarlaıdy QazAqparat tilshisi.

Bul týraly Memlekettik kirister komıteti tóraǵasynyń orynbasary Qaırat Mııatov málim etti.

«Zań jobasyna enbeı qalǵan ózge de usynystar bar. Sol usynystar negizinde zańdy qoldanys tártibinde jetildirý kózdelip otyr. Atap aıtsaq, nesıe berýshilerge sot arqyly bankrottyq rásimdeý bastamasyn kóterýge múmkindik berý usynyldy. Sondaı-aq, atalǵan zańnyń kúshin sheteldikterge, qandastarǵa jáne Qazaqstan aýmaǵynda turaqty turatyn tulǵalarǵa da taratý qajet degen pikirler bar. Bankrottyǵyn rásimdegen jeke tulǵalarǵa basshylyq laýazym atqarýǵa, aktsıonerlik zańdy tulǵanyń quryltaıshysy bolýǵa tyıym salý jáne memlekettik organdarda jumys isteýge shekteý qoıý týraly usynystar boldy. Bulardy zań kúshine enip, qoldanysqa engen kezde tájirıbege súıenip, asyqpaı qaraý kerek», - dedi komıtet tóraǵasynyń orynbasary.

Zań jobasyn ázirleýge qatysqandardyń arasynda nesıe berýshilerge boryshkerdiń otbasy músheleri týraly aqparat jınaýǵa ruqsat berýdi usynǵandar da bolǵan kórinedi.

«Sondaı-aq, nesıe berýshige bankrottyǵyn rásimdegen jeke tulǵanyń otbasy músheleriniń múlki týraly aqparatqa qol jetkizý múmkindigin berý kerektigi aıtyldy. Biz ázirge mundaı múmkindikti qarjylyq basqarýshyǵa ǵana berýdi usynamyz. Ári qaraıǵysyn zań kúshine engen kezde kórý kerek», - dedi Qaırat Mııatov.