Jeke tulǵalardyń múlikti ótkizý kezinde alǵan kiristerin kameraldyq baqylý avtomattandyryldy

NUR-SULTAN. QazAqparat - QR QM Memlekettik kirister komıteti jeke tulǵalardyń múliktik kirisi boıynsha kameraldyq baqylaýdy iske qosýdy avtomattandyrdy, dep habarlaıdy QazAqparat.

«Kameraldyq baqylaýmen jeke tulǵalardyń 2018 jáne 2019 jyldary Qazaqstan Respýblıkasyndaǵy turǵyn ári turǵyn emes úı-jaılardy ótkizý kezinde qun ósiminen túsetin kirister boıynsha salyq mindettemelerin oryndaý máselesi qamtyldy», - delingen komıtet málimetinde.

Elektrondy tsıfrlyq qoltańbasy (ETsQ) bar azamattar qalyptastyrylǵan habarlamalardy / eskertpelerdi elektrondy túrde «Salyq tóleýshiniń kabıneti» veb-qosymshasyna jáne E-gov portalyndaǵy jeke kabınetine aldy. ETsQ-sy joq azamattarǵa habarlamalardy aýdandar men qalalar boıynsha Memlekettik kirister basqarmalary jeke ózderi qol qoıǵyzyp nemese poshta arqyly tapsyrys hatpen tabys etetin bolady.

Kameraldyq baqylaý nátıjeleri boıynsha salyq organdary anyqtaǵan talapty buzýshylyqtardy joıý týraly habarlamany alǵan kúnnen keıingi kúnnen bastap sanaǵanda otyz jumys kúni ishinde oryndaý qajet.

Habarlamany qalaı oryndaý kerek?

• Habarlamada kórsetilgen talapty buzýshylyqtarmen kelisken jaǵdaıda - salyq eseptiligin tapsyrý kerek.

• Habarlamada kórsetilgen kemshiliktermen kelispegen jaǵdaıda - habarlamany jibergen salyq organyna anyqtalǵan talapty buzýshylyqtar boıynsha túsindirmeni qaǵaz nemese elektrondy túrde usyný kerek.

Eger túsindirmede dáleldemelerdi rastaý úshin qujattar kórsetilse, onda qujattardyń kóshirmeleri mindetti túrde túsindirmege qosa jalǵanady. Túsindirmeni qaǵaz nemese elektrondy túrde habarlamany jibergen salyq organyna tabys etý kerek.

«Táýekel dárejesi ortasha ereje buzýshylyqtar boıynsha jeke tulǵaǵa eskertpe joldanady. Ol málimet úshin jiberiledi. Bul eskertpeniń oryndaý merzimi belgilenbeıdi», - dep atalyp ótken Memlekettik kirister komıteti habarlamasynda.