Jeke tulǵalardyń bankrottyǵy: Azamattar qandaı shekteýlerge tap bolady

NUR-SULTAN. QazAqparat – Jeke tulǵalardyń bankrottyǵyn retteıtin zań jobasyn tanystyrǵan Memlekettik kirister komıteti tóraǵasynyń orynbasary Qaırat Mııatov sottan tys bankrottyq rásimdegen azamattar qandaı shekteýlerge jolyǵatynyn túsindirdi, dep habarlaıdy QazAqparat tilshisi.

«Sottan tys bankrottyq rásimdegender mynadaı shekteýlerge tap bolatynyna nazarlaryńyzdy aýdarǵym keledi. Birinshiden, qaryz mindettemeleriniń bári ýaqyty ótken bolyp esepteledi. Boryshkerge qaryz alý boıynsha kelisimder jasaýǵa, kepildik jáne senimgerlik bildirýge tyıym salynady. Emdelý, bilim alý, adam jerleýge qatysty sebepter bolmasa, shetelge shyǵýǵa bolmaıdy», - dedi ol zań jobasyn talqylaýǵa arnalǵan beınekonferentsııada.

Sottan tys bankrottyq rásimdelgennen keıin qaryz bergen bank, mıkrokredıt uıym nemese kollektorlyq agenttik boryshkerden qaryzdy óteýdi talap ete almaıdy. Sondaı-aq, boryshpen birge esepteletin aıyppuldar men ósimpuldardyń bári toqtatylady.

«Qaryz berýshige boryshkerden mindettemelerdi oryndaýdy talap etýge tyıym salynady. Sondaı-aq, aıyppul, ósimpul jáne paıyzdyq syıaqy esepteý toqtatylady», - dedi Qaırat Mııatov.