Jeke tulǵalardyń 21,1 mlrd salyq bereshegi bar - Qarjy mınıstri
Onyń aıtýynsha, Qarjy mınıstrligi jeke tulǵalar úshin salyqtyq raqymshylyq júrgizý jónindegi Jol kartasyn ázirledi. 2019 jyldyń 1 qańtardaǵy jaǵdaı boıynsha 1 mln 387 myń jeke tulǵanyń 21,1 mlrd teńge kólik quraldaryna salynatyn salyq, múlik salyǵy jáne jer salyǵy boıynsha bereshekteri bar.
«Jol kartasy jeke tulǵalardyń krıterıılerin jáne salyqtyq raqymshylyq júrgiziletin bereshek somalaryn ázirleýge, zańnamaǵa túzetýler ázirleýge baǵyttalǵan birqatar is-sharalardy, sondaı-aq salyqtyq raqymshylyqtyń ózin júrgizý jónindegi is-sharalardy kózdeıdi. Parlamentke zańnamaǵa túzetýler engizýdiń josparlanǵan merzimi - 2019 jylǵy naýryz. Maýsym aıynda zańdy qabyldaý jáne jyl sońyna deıin raqymshylyq jasaýdy aıaqtaýymyz kerek», - dedi mınıstr.
Á.Smaıylov qazirgi ýaqytta Elbasynyń tapsyrmasy boıynsha júrgizilip jatqan shaǵyn jáne orta bızneske salyqtyq raqymshylyq derekterine toqtaldy.
«1 aqpandaǵy jaǵdaı boıynsha 27 868 salyq tóleýshi ózderiniń somasy 5,9 mlrd teńge bereshekterin tóledi. Osyǵan baılanysty 1,1 mlrd teńge ósimpul jáne 0,1 mlrd teńge aıyppul esepten shyǵarylady. Bul jumys jyl aıaǵyna deıin jalǵasady», - dedi ol.
Aıta keteıik, ótken jyly 5 qazanda Qazaqstan Respýblıkasynyń Prezıdenti Nursultan Nazarbaev «Qazaqstandyqtardyń ál-aýqatynyń ósýi: Tabys pen turmys sapasyn arttyrý» Qazaqstan halqyna Joldaýyn jarııalap, onda 2019 jyldyń 1 qańtarynan bastap shaǵyn jáne orta bıznes úshin salyqtyq amnıstııany ótkizýdi tapsyrǵan bolatyn.
«Bıznes jumysyn taza paraqtan bastaýy úshin 2019 jyldyń 1 qańtarynan shaǵyn jáne orta bıznes úshin salyqtyq amnıstııa júrgizýge kirisýdi tapsyramyn», - degen edi Elbasy.