Jeke sot oryndaýshylary, notarıýs jáne advokattar avtomattandyrylǵan rejımde attestatsııadan óte alady

ASTANA. QazAqparat - Jeke sot oryndaýshylary, notarıýstar, advokattar, sot sarapshylary men patenttik senim bildirilgen ókilderdi avtomattandyrylǵan rejımde attestattaýdan ótkizetin pılottyq joba iske qosyldy, dep habarlaıdy QazAqparat.

Búgin Memlekettik qyzmet isteri agenttigi janyndaǵy memlekettik qyzmet personalyn basqarý ulttyq ortalyǵynda Ádilet mınıstrligimen jeke sot oryndaýshylary, notarıýstardy, advokattardy, sot sarapshylaryn jáne patenttik senim bildirilgen ókilderdi avtomattandyrylǵan rejımde attestattaýdy ótkizý jónindegi pılottyq joba tanystyryldy.

Memleket basshysynyń memlekettik qyzmet kórsetý úderisterin reınjınırıngteý jáne ońtaılandyrý jónindegi tapsyrmasy aıasynda Ádilet mınıstrligi agenttik pen Tsıfrlyq damý, ınnovatsııalar jáne aeroǵarysh ónerkásibi mınıstrligimen birlesip attestattaý úderisterin avtomattandyrý jumysyn júrgizdi.

Pılottyq jobany iske qosý sharasyna Memlekettik qyzmet isteri agenttiginiń tóraǵasy Darhan Jazyqbaev pen Ádilet mınıstri Azamat Esqaraev qatysty.

Darhan Jazyqbaev bıýrokratııaǵa jol bermeıtin servıstik sıpattaǵy memlekettik apparat qalyptastyrý aıasynda memlekettik qyzmet kórsetýdiń ashyqtyǵy men qoljetimdiligin qamtamasyz etýdiń mańyzyn aıtty.

Mysal retinde MQІA tóraǵasy agenttik ázirlegen jáne 2023 jylǵy 1 naýryzda iske qosylǵan «adamı faktorǵa» jol bermeıtin memlekettik qyzmetke jańa irikteý algorıtmin atap ótti.

Jańa formatqa sáıkes, endi úmitkerler «E-qyzmet» portaly arqyly kez kelgen ýaqytta jáne álemniń kez kelgen núktesinen konkýrsqa qatysýǵa múmkindik alady.

Búgingi kúni memlekettik qyzmetke irikteýdiń jańa júıesi bes memlekettik organda pılottyq rejımde iske asyrylýda.

Agenttiktiń avtomattandyrylǵan pılottyq jobalardy engizýdegi oń tájirıbesi jáne qazirgi zamanǵy testileý zaldarynyń bolýy eskerile otyryp, testileý úshin «Memlekettik qyzmet personalyn basqarý jónindegi ulttyq ortalyq» AQ alańy tańdaldy.

Ulttyq ortalyqtyń tehnıkalyq jabdyqtalǵan zaldarynda testileýdi ótkizý ashyqtyqty qamtamasyz etip, adamı faktordy boldyrmaıdy, sonymen qatar memlekettik qyzmet kórsetý merzimin edáýir qysqartady jáne úmitkerlerge yńǵaıly ýaqytta attestattaýdan ótýge múmkindik beredi.

Jańa tásil bastapqy kezeńde Astana, Shymkent qalalarynda jáne Túrkistan oblysynda synaqtan ótedi.