Jeke sot oryndaýshysy 1,2 mln teńge alımentti qaltasyna basqan

<p>ASTANA. KAZINFORM &ndash; Bas prokýratýra jeke sot oryndaýshylarynyń óndirip alýshylarǵa arnalǵan alımentti urlaý faktilerin jarııa etti.</p>

2022 jyly prokýratýra jeke sot oryndaýshylary óndirip alýshylardyń 1,1 mlrd teńge aqshasyn zańsyz ıelengenin anyqtady.

«Boryshkerlerden aqsha qarajattary aǵymdaǵy esepshottarǵa túskennen keıin jeke sot oryndaýshylary olardy qolma-qol aqshamen sheship alyp, banktik depozıtterine aýdarǵan jáne paıyz alǵan, jubaılaryna aýdarǵan, óz qalaýy boıynsha ıelik etken. Anyqtalǵan faktiler boıynsha polıtseıler Qylmystyq kodekstiń 251-baby (jeke sot oryndaýshylarynyń ókilettikterin asyra paıdalanýy) boıynsha sotqa deıingi 16 tergeý bastady. Keıinnen zalaldyń tolyq ótelýine baılanysty qylmystyq ister toqtatyldy», - dep atap ótti vedomstvodan agenttiktiń resmı saýalyna oraı.

Osydan keıin Bas prokýratýra Ádilet mınıstriniń atyna jeke sot oryndaýshylarynyń aǵymdaǵy esepshottaryna baqylaý júıesin engizý usynysyn joldady. Júrgizilgen tekserýler nátıjesinde 9 jeke sot oryndaýshysynyń lıtsenzııasynyń qoldanylýy toqtatyldy jáne 55 adam tártiptik jazaǵa tartyldy.

Astana prokýratýrasy 2023-2024 jyldary sot oryndaýshylarynyń aqsha qarajattaryn ıemdenýiniń birneshe faktisin anyqtady. máselen, sot oryndaýshysy A.Ablahan 6 aı boıy boryshkerlerden alıment tólemderin alyp, ony jeke qajettiligine jumsaǵan. Ol osy zańsyz áreketi arqyly 34 balaǵa 1,2 mln teńge mólsherinde zalal keltirdi. Atalǵan fakti boıynsha sotqa deıin tergeý júrgizilip, ol shyǵyndy tolyq kólemde ótedi. 2024 jyldyń 5 aqpanynda taraptardyń tatýlasýyna baılanysty qylmystyq is toqtatyldy. Al jeke sot oryndaýshysy O.Osıanov alıment retinde túsken 1 mln teńgeni balasynyń jeke esepshotyna aýdaryp alǵan. Bul rette de sot oryndaýshysynyń shyǵyndy tolyq óteýine jáne taraptardyń tatýlasýyna baılanysty qylmystyq is toqtatyldy.

«Jalpy, sońǵy 2 jylda prokýratýra organdaryna jeke sot oryndaýshylarynyń is-áreketine qatysty 6 973 shaǵym tústi. Olardyń basym bóligi sot aktileriniń oryndalmaýyna, sot oryndaýshylarynyń áreketsizdigine jáne olardyń boryshkerlerge shara qoldanbaýyna qatysty boldy», - dedi prokýratýradan.

Osyǵan deıin elimizde 11 myń áıeldiń alıment tólep júrgeni týraly jazdyq.