Jeke sot oryndaýshylary qaıtys bolǵan boryshkerlerden qaryzyn óndirip kelgen

<p>Qostanaı oblysynda sot oryndaýshylary qaıtys bolǵan boryshkerler men óndirip alýshylarǵa qatysty isterdi ýaqytsha toqtatý boıynsha tıisti sharalar qabyldamaǵan. Muny óńir prokýratýrasy anyqtaǵan, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform</a>.</p>

Bas prokýratýranyń málimetine súıensek, «Atqarýshylyq is júrgizý jáne sot oryndaýshylarynyń mártebesi týraly» Zańǵa sáıkes, eger quqyqtyq qatynastar muragerlikke múmkindik berse, sot oryndaýshysy óndirip alýshy qaıtys bolǵan jaǵdaıda bir jumys kúni ishinde atqarýshylyq is júrgizýdi toqtata turýǵa mindetti (42-bap 1-tarmaqsha).

«Bul jaǵdaıda óndirip alýshynyń quqyqtyq mırasqory anyqtalǵanǵa deıin atqarýshylyq is júrgizý toqtatyla turady.

Eger óndirip alýshy nemese boryshker bolǵan azamat qaıtys bolǵannan keıin sheshimde belgilengen talaptar nemese mindetter qaıtys bolǵan adamnyń quqyqtyq mırasqoryna aýysa almasa, onda atqarýshylyq is júrgizý toqtatylady», - dep naqtylanǵan baspasóz baıanynda.

Taldaý barysynda prokýratýra anyqtaǵan buzýshylyqtar:

- qaıtys bolǵan boryshkerlerden alıment óndirip alý týraly 33 is toqtatylmaǵan;

- qaıtys bolǵan 13 alıment óndirip alýshyǵa qatysty óndirip alýshyny aýystyrý týraly másele sheshilmegen (onyń ishinde qorǵanshylyq pen qamqorshylyq belgilengennen keıin);

- qaıtys bolǵan boryshkerlerge qatysty jalpy somasy 5 mln teńgeden asatyn ákimshilik aıyppuldar boıynsha 264 is toqtatylǵan joq;

- memleket kirisine 4,6 mln teńge óndirip alý týraly 94 is toqtatylmaǵan.

«Zańdy saqtamaý saldarynan qaıtys bolǵan 390-nan astam azamat boryshker bolyp qala bergen.

Osy fakti boıynsha jeke sot oryndaýshylarynyń óńirlik palatasynyń atyna zań buzýshylyqtardy joıý týraly usynys engizildi. Qadaǵalaý aktisi qaralý kezinde», - delingen Bas prokýratýra aqparatynda.