Jeke mobıldi aýdarymdarǵa salyq salynbaıdy
Aıta ketsek, jeltoqsan aıynda QR-da «Salyq jáne bıýdjetke tólenetin basqa da mindetti tólemder týraly» Kodekske (salyq kodeksi) túzetýler qabyldandy.
Orynkúl Qazıeva 2022 jyldyń 1 naýryzynan bastap el men megapolıs turǵyndaryna qandaı ózgerister áser etetinin aıtty.
Almaty memlekettik kirister departamentiniń ókili elimizde shaǵyn jáne orta bıznes sońǵy jyldary kásipkerlik qyzmette jeke tulǵalar arasyndaǵy tranzaktsııalarǵa arnalǵan jedel mobıldi aýdarymdardy jappaı paıdalana bastaǵanyn atap ótti.
Sondyqtan da osy máseleni zańnamalyq retteý úshin «Mobıldik tólemder» jáne «mobıldik aýdarymdar» uǵymy aıqyndaldy.
Memlekettik kirister departamenti basshysynyń orynbasary atap ótkendeı, mobıldi tólemderdi fıskalızatsııalaý kez kelgen adam úshin jańa salyqtyń paıda bolýyn bildirmeıdi, tek bıznestiń qoldanystaǵy zańnamada qarastyrylǵan salyq mindettemelerin oryndaýyna baǵyttalǵan.
«Jalpy, mobıldik aýdarymdardy paıdalanýǵa qatysty salyq zańnamasyna engizilgen túzetýler jeke tulǵalardyń mobıldik tólemderden jeke aýdarymdaryn kásipkerlik maqsatta júzege asyrylatyn mobıldik tólemderden bólýge arnalǵan. Olar bıznes-qoǵamdastyqpen jáne banktermen birneshe ret talqylandy», - dedi Orynkúl Qazıeva.
Spıker atalǵan bastamalardyń maqsaty tsıfrlyq keńistikte bıznesti odan ári damytýǵa arnalǵanyn aıtty. Qolma-qol esep aıyrysýǵa kóshý maqsattaryn kózdemeıdi. Memlekettik kirister organdaryna derekterdi berýge qatysty barlyq alańdaýshylyqtar negizsiz.
«Bankterden málimetter alý kásipkerlik shottarǵa túsetin tólemder boıynsha ǵana júrgiziletin bolady. Osylaısha, jeke aýdarymdarǵa salyq salynbaıdy. Mobıldik tólemderge qatysty normalar 2022 jylǵy 1 naýryzdan bastap kúshine enedi. Kásipkerlik qyzmet belgileri bar mobıldi tólemder boıynsha derektermen almasý tek 2025 jyldan bastap josparlanady»,- dedi spıker.
Sonymen qatar, Orynkúl Qazıeva ekinshi deńgeıli bankter men memlekettik organdar arasynda jasalǵan mobıldik aýdarymdar týraly aqparat almasý qalaı júretinin túsindirdi.
«Birinshiden, dara kásipkerler boıynsha mobıldik tólemder jónindegi málimetterdi ekinshi deńgeıdegi bankter memlekettik kiris organdaryna: aı saıyn, E-salyk Business salyq rejımin qoldanatyndar boıynsha, sondaı-aq qyzmetti basqa salyq rejımderinde júzege asyrǵan kezde jáne osyndaı málimetterdi berýge kelisim bergen kezde; jylyna bir ret barlyq dara kásipkerler boıynsha (post-termınaldar boıynsha málimetterdi berýge uqsas, qoldanystaǵy norma) beredi.
Kásipkerler bolyp tabylmaıtyn jeke tulǵalarǵa qatysty MKK jáne ekinshi deńgeıdegi bankter arasynda aqparat almasý QR Ulttyq bankimen, QR Qarjy naryǵyn retteý jáne damytý agenttigimen, Qazaqstan qarjygerleriniń qaýymdastyǵymen jáne ekinshi deńgeıdegi banktermen birlesip ázirleý josparlanyp otyrǵan krıterıılerge sáıkes júzege asyrylatyn bolady.
Ólshemderdi bekitý jónindegi normatıvtik quqyqtyq aktiniń jobasy jarııa talqylaý úshin «Ashyq NQA» portalynda jarııalanady»,- dedi ol.
Budan basqa, málimet almasý júrgiziletin tulǵalar sanattary jeke tulǵalardyń jalpyǵa birdeı deklaratsııalaýǵa kirýine uqsas kezeń kezeńimen júzege asyrylady.