Jeke kýálikti birneshe ret joǵaltqan qazaqstandyqtar memlekettik bajdy kóbirek tóleıdi

ASTANA. QazAqparat – Jeke kýálikti bir jylda birneshe ret joǵaltatyn qazaqstandyqtar ony qaıta rásimdeý kezinde memlekettik bajdy kóbirek tóleıdi. Májilistiń qaraýyna berilgen «Salyq jáne bıýdjetke tólenetin basqa da mindetti tólemder týraly» zań jobasynda osyndaı ózgeris engizý usynylǵan, dep habarlaıdy QazAqparat tilshisi.

«Jyl saıyn orta eseppen jeke basyn kýálandyratyn joǵalǵan qujattardy qalpyna keltirý máselesi boıynsha 350 myńnan astam adam (jeke kýálik – 335 myń, pasport – 15,6 myń) ótinish jasaıdy. Osyǵan baılanysty, jeke kýálikti 1 jyl ishinde 2 jáne odan da kóp ret joǵaltqan azamattar jeke kýálikti qalpyna keltirý úshin 1 AEK-ke (3 450 teńge) deıin baj tóleý usynylady», - delingen jańa redaktsııada.

Qujattyń túsindirmesinde jazylǵandaı, bir jylda shamamen 7 806 qazaqstandyq jeke kýálikti eki retten kóp joǵaltady.

«Joǵalýyna baılanysty jyl saıyn jeke kýáligin resimdeıtin 335 myń azamattyń 7 806-sy jyl ishinde orta eseppen 2 retten kóp ótinish jasaıdy. Bul - jeke basyn kýálandyratyn qujatqa nemquraıly qaraýdy kórsetedi. Bul jaǵdaıda qujatty qaıta resimdeý kezinde memlekettik bajdyń ulǵaıýy azamattardy jeke basyn kýálandyratyn qujattarǵa neǵurlym uqypty qaraýǵa yntalandyratyn bolady», - dep engizilgeli otyrǵan qujatqa túsindirme berilgen.

Aıta keteıik, qazir jeke kýálikti alý úshin tólenetin memlekettik bajdyń mólsheri - 0,2 AEK (690 teńge). Endi jańa ózgeriske sáıkes, qujatty eki retten kóp joǵaltqan jaǵdaıda ony qaıta rásimdeý quny 3 450 teńge bolmaq.