Jeke qosalqy sharýashylyqtar ónimderin tómen baǵaǵa satýǵa májbúr - Pavel Kazantsev
Búgin Parlament Májilisinde «Jeke qosalqy sharýashylyq týraly» jáne «Qazaqstan Respýblıkasynyń keıbir zańnamalyq aktilerine jeke qosalqy sharýashylyqtardyń qyzmeti máseleleri boıynsha ózgerister men tolyqtyrýlar engizý týraly» zań jobalary tanystyryldy.
«Zań jobalary Memleket basshysynyń «Halyq birligi jáne júıeli reformalar – el órkendeýiniń berik negizi» Joldaýynyń Jalpyulttyq is-sharalar josparyn iske asyrý maqsatynda ázirlendi. Memleket basshysy Úkimet aldyna jeke qosalqy sharýashylyqtardyń quqyqtyq mártebesin aıqyndaý, olar úshin memlekettik qoldaýdyń naqty quraldaryn belgileý, óńirlik azyq-túlik habtaryn qurýǵa tartý arqyly olardyń áleýettin damytý, sondaı-aq, jeke qosalqy sharýashylyqtardyń aýyl sharýashylyǵy ónimderin ótkizý naryqtary men jaıylym resýrstaryna qol jetkizýin qamtamasyz etý boıynsha mindetter qoıdy. Shynynda da, qazirgi ýaqytta aýyl sharýashylyǵy ónimderiniń negizgi bóligin shaǵyn aýyl sharýashylyǵy qurylymdary men jeke qosalqy sharýashylyqtar óndiretini qupııa emes, olardyń aýyl sharýashylyǵynyń jalpy ishki ónimdegi úlesi shamamen 75 paıyzdy quraıdy», - dedi P. Kazantsev Májiliste zań jobalarynyń tanystyrylymy kezinde.
Onyń aıtýynsha, bul rette memlekettik qoldaý men jeńildetilgen nesıeleýdiń basym úlesi negizinen iri aýyl sharýashylyǵy taýaryn óndirýshilerge beriledi. Jeke qosalqy sharýashylyq júrgizetin azamattar úshin memlekettik qoldaý sharalary joq. Kóp jyldar boıy aýyl maldaryn qoǵamdyq jaıylymdarǵa shyǵarý máselesi sheshilmeı keledi. Bul máseleni sheshý týraly depýtattardyń atyna kómek surap jazǵan ótinishter turaqty túrde túsýde.
«Sondaı-aq, kóbinese jeke qosalqy sharýashylyqty júrgizetin azamattar óz ónimderin deldaldarǵa tómen baǵamen satýǵa májbúr bolady, óıtkeni olar óz ónimderin uıymdasqan sharýashylyqtar men qaıta óńdeý kásiporyndaryna bere almaıdy. Munyń bári aýyl turǵyndarynyń qarjylyq jaǵdaıyna teris áserin tıgizedi, olardyń fermerlik sharýashylyqtarǵa aınalýyna jáne jalpy óz áleýetin ashýyna múmkindik bermeıdi. Aýyl sharýashylyǵy mınıstrligi osy máselelerdi sheshý maqsatynda tıisti zań jobalaryn ázirledi.
Qazirgi ýaqytta zań jobalary boıynsha jumys toby quryldy, oǵan kirýge tilek bildirgenderdiń barlyǵyn qostyq, biraq kez kelgen ýaqytta talqylaýǵa arnalǵan alań ashyq, sondyqtan barlyq tilek bildirýshiler qatysa alady», - dedi Pavel Kazantsev.