Jeke kásipkerlikti tirkeý bir saǵatta iske asyrylady

NUR-SULTAN. QazAqparat - Elektrondyq ótinishten keıin jeke kásipkerlikti tirkeý bir saǵatta iske asyrylady. Bul týraly Parlament Májilisiniń jalpy otyrysynda memlekettik qyzmetter kórsetýge arnalǵan zań jobasyn talqylaý kezinde málim boldy, dep habarlaıdy QazAqparat tilshisi.

Májilis depýtaty Maıra Aısına zań jobasynyń negizgi tustaryn atap ótti.

«Sybaılas jemqorlyq táýekelderin bolǵyzbaý jáne bızneske qolaıly jaǵdaı jasaý maqsatynda orta jáne iri kásipkerlik sýbektilerin tirkeýdi tolyǵymen elektrondyq formatqa kóshirý ári qujattar tizbesin ońtaılandyrý kózdeledi. Nátıjesinde, jeke kásipkerlikti tirkeý elektrondyq ótinish berilgen kezden bastap qazirgideı bir kún emes, bir saǵattyń ishinde júzege asyrylatyn bolady», - dedi ol.

Depýtattyń sózine qaraǵanda, zań jobasynda áke bolýdy belgileý men asyrap alýdy memlekettik tirkeýdi alyp tastaý kózdelgen. Óıtkeni áke bolýdy belgileý jáne asyrap alý týraly sheshim shyǵarǵan sot osy sheshimdi tirkeýshi organǵa elektrondyq túrde jiberedi.

«Bul qaǵaz qujat aınalymyn edáýir qysqartyp, blankige jumsalatyn shyǵyndardy, adamdardyń ártúrli satyǵa barýyn azaıtady. Buǵan qosa, asyrap alý qupııasy saqtalady, sebebi asyrap alý/áke bolýdy anyqtaý týraly kýálik qolǵa berilmeıdi», - dedi Maıra Aısına.

Talqylaýdan keıin palata depýtattary «Qazaqstan Respýblıkasynyń keıbir zańnamalyq aktilerine memlekettik qyzmetter kórsetý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.

Budan buryn habarlanǵandaı, atalǵan zań jobasy aıasynda zeınetaqy qujattaryn rásimdeýde ózgerister bolady.

Sonymen qatar, Qazaqstan aýmaǵyndaǵy kez kelgen tirkeýshi organǵa ótkizýge bolatyny aıtylǵan edi.