Jeke kásipkerler men zańdy tulǵalardyń salyq qaryzdary: shot buǵattala ma

ASTANA. QazAqparat – Salyq qaryzyn tólemegenderdiń banktik shottary men kassa boıynsha shyǵys operatsııalaryn salyqshylar toqtata ala ma? Memlekettik kirister komıteti bul sharalar qandaı jaǵdaıda qoldanylatynyn túsindirdi, dep habarlaıdy QazAqparat.

Salyq kodeksiniń 19-babynda memlekettik kirister organy salyq mindettemesiniń oryndalýyn qamtamasyz etý tásilderin qoldanýǵa jáne salyq tóleýshiniń salyqtyq bereshegin májbúrlep óndirip alýǵa mindetti ekendigi kózdelgen.

Bul rette merziminde oryndalmaǵan salyq mindettemesiniń oryndalýyn qamtamasyz etý tásilderin qoldaný bastalǵanǵa deıin salyq tóleýshige salyq bereshegin óteý týraly habarlama jiberiledi. Ol oryndalmaǵan jaǵdaıda memlekettik kirister organy táýekelderdi basqarý júıesine sáıkes: táýekeldiń joǵary deńgeıinde salyq bereshegin óteý týraly habarlama tabys etilgen kúnnen bastap bir jumys kúni ótken soń, táýekeldiń ortasha deńgeıinde salyq bereshegin óteý týraly habarlama tabys etilgen kúnnen bastap on jumys kúni ótken soń salyq tóleýshiniń banktik shottary men kassasy boıynsha shyǵys operatsııalaryn toqtata turýdy júrgizedi.

Shyǵys operatsııalaryn toqtata turý týraly ókimdi shyǵarǵan memlekettik kirister organy salyq bereshegi ótelgen kúnnen keıingi bir jumys kúninen keshiktirmeı banktik shottar men kassasy boıynsha shyǵys operatsııalaryn toqtata turý týraly ókiminiń kúshin joıady.

Bul rette banktik shottar men kassasy boıynsha shyǵys operatsııalaryn toqtata turý týraly ókim qalyptastyrý jáne jiberý «Ortalyqtandyrylǵan birizdendirilgen derbes shottar» aqparattyq júıesinde júrgiziletin derbes shottardyń derekterin eskere otyryp, «Qazaqstan Respýblıkasynyń ıntegratsııalanǵan salyqtyq aqparattyq júıesi» aqparattyq júıesinde avtomatty rejımde júrgiziledi.

Salyq qaryzdaryn óndirýdiń atalǵan sharalary tek jeke kásipkerler men zańdy tulǵalarǵa qatysty ǵana qoldanylady.