Jeke derektermen jumys isteıtin aqparattyq júıelerge qoıylatyn talap kúsheıedi

NUR-SULTAN. QazAqparat – QR Tsıfrlyq damý, ınnovatsııalar jəne aeroǵarysh ónerkəsibi mınıstri Baǵdat Mýsın Májiliste jeke derektermen jumys isteıtin aqparattyq júıelerge qoıylatyn talaptar kúsheıtiletinin málim etti, dep habarlaıdy QazAqparat tilshisi.

Májilis ınnovatsııalardy yntalandyrý, tsıfrlandyrýdy jáne aqparattyq qaýipsizdikti damytý máselelerine qatysty zań jobasyn birinshi oqylymda qarap jatyr.

Qujattyń tolyq ataýy - «Qazaqstan Respýblıkasynyń keıbir zańnamalyq aktilerine ınnovatsııalardy yntalandyrý, tsıfrlandyrýdy jáne aqparattyq qaýipsizdikti damytý máseleleri boıynsha ózgerister men tolyqtyrýlar engizý týraly» QR Zańynyń jobasy.

Qujatty Tsıfrlyq damý, ınnovatsııalar jəne aeroǵarysh ónerkəsibi mınıstri Baǵdat Mýsın tanystyrdy.

«Bul zań jobasynda úsh kontseptýaldy baǵytqa negizdelgen normalar bar. Olar: memlekettik basqarýdy tsıfrlyq tarnsformatsııadan ótkizý, derekterdi basqarý júıesin retke keltirý jáne elektrondyq qujattardy teń dárejede qoldanyp, aıasyn keńeıtý», - degen mınsıstr bul qujat memlekettik basqarýdy bıýrokratııadan aryltyý prıntsıpine sáıkes ekenin eske saldy.

«Memlekettik apparat qyzmetinde tsıfrlyq transformatsııaǵa basymdyq berý, bıznes-úderisterge reınjınırıng jasaý quraldaryn engizý, aqparattandyrý salasyndaǵy ýákiletti organnyń jáne oǵan vedomstvolyq baǵynysty uıymnyń mártebesin aıqyndaý.

Tsıfrlyq transformatsııa quraldarynyń eń basty artyqshylyǵy – bıýrokratııanyń sebep-saldaryn, sonyń ishinde kúrdeli, túsiniksiz jáne kóleńkeli tustary kóp protsedýralardy alyp tastaýǵa múmkindik beredi.

Reınjınırıng jasaý arqyly kózge kórinbeıtin kedergilerdi anyqtap, joıýǵa, sondaı-aq shyǵyndardy azaıtyp, kadrlyq jáne qarjylyq turǵyda únemdi ári tıimdirek bıznes-protsester qurýǵa jol ashylady», - dedi Baǵdat Mýsın.

Onyń aıtýynsha, zań jobasy derbes derekterdi qorǵaýdy qamtamasyz etý úshin aqparattyq-kommýnıkatsııalyq tehnologııalardy qoldaný talaptaryn kúsheıtýdi kózdeıdi.

«Bul úshin zań jobasynda jeke derekterdi jınaýdy, óńdeýdi jáne saqtaýdy júzege asyratyn aqparattyq júıelerdi aqparattyq-kommýnıkatsııalyq ınfraqurylymnyń asa mańyzdy obektileri retinde taný jáne olardy qorǵaýǵa qoıylatyn talaptardy kúsheıtý usynylady. Sondaı-aq memlekettik aqparattyq júıeler men servısterde osaldyqtardy anyqtaý jáne joıý úshin otandyq jeke IT-mamandardyń áleýetin paıdalaný usynylady», - dedi vedomstvo basshysy.

Aıta keteıik búgingi Májilistiń jalpy otyrysynda Aıdos Sarym Májilistiń Halyqaralyq ister, qorǵanys jáne qaýipsizdik komıtetine aýysty.