Jeke derekteri qoldy bolǵan «Bolashaq» stıpendıaty AQSh-qa vıza ala almaı júr
«Bolashaq» baǵdarlamasymen Amerıkada oqýym kerek edi. Tildik kýrstardy aıaqtaǵan soń, stýdenttik vızany jańartyp, AQSh-ta akademııalyq bilim alý úshin Qazaqstanǵa oraldym. Biraq, Almatydaǵy AQSh Konsýldyǵy maǵan vıza berýden bas tartty, sebebi Abzal Muqashev esimdi qazaqstandyq meniń anketalyq derekterimdi paıdalanyp, jalǵan qujattarmen aınalysqan. Ol meniń aty-jónimdi kórsetken. Sondyqtan, 212 A babymen (Sheteldikter kontrabandasy) maǵan jáne áıelime vızaǵa tyıym salyndy», - dedi A. Berdibaev «Nur Otan» partııasyndaǵy qoǵamdyq qabyldaýda.
Osydan keıin A. Berdibaev ІІM jáne prokýratýraǵa birneshe ret habarlasqan.
«Qylmys tabylmady degen jeleýmen is jabylyp qala berdi. Konsýldyqpen birneshe ret kelissózder júrgizgen soń, amerıkalyq tarap maǵan aqtalýǵa, jaǵdaıdy túsindirýge sońǵy múmkindik berip otyr. Men úshin bul vızany alý mańyzdy. Sebebi, vıza berilmese 10 mln teńge qaryz moınyma júkteledi nemese ákemniń úıin alyp qoıady», - dedi almatylyq turǵyn.
Óz kezeginde Muhtar Tileýberdi AQSh Bas konsýldyǵymen taǵy bir ret kezdesý qajettigin aıtty.
«Iá, zań boıynsha «Bolashaq» talaptarynyń qatal ekenin bilemiz. Konsýldyq qyzmet departamentiniń qyzmetkeri dúısenbi kúni Almatyda bolady jáne sizben kezdesedi. Sosyn AQSh Bas konsýldyǵyna baryp, kelissózder júrgizesizder. Olarǵa ne qajet ekenin taǵy anyqtaý kerek. Eger «Bolashaq» baǵdarlamasynyń stıpendıaty ekenińizdi resmı rastaý kerek bolsa, qujattardy ázirlegen jón. Sonda biz QR SІM resmı notasymen sizge vıza berý týraly saýal joldaımyz. Bizdiń ókilimiz sizben kezdesý úshin Almatyǵa arnaıy barady», - dep jaýap berdi mınıstr.
Aıta keteıik, QR Syrtqy ister mınıstri Muhtar Tileýberdi «Nur Otan» partııasynda qoǵamdyq qabyldaý ótkizip, turǵyndardyń máselelerin tyńdady.
Buǵan deıin mınıstr Qytaıda esirtki kontrabandasymen aıyptalǵan otandasymyz Aqjarqyn Turlybaı isi týraly pikir bildirgen edi.