Jeke adamnyń bankrottyǵy úsh rásim aıasynda júzege asýy múmkin

NUR-SULTAN. QazAqparat - Memlekettik kirister komıteti elimizdiń nesıeleri, salyq qaryzdary men kommýnaldyq tólemderden qaryzdary eń joǵary jáne kóp shoǵyrlanǵan oblys ortalyqtarynda bankrottyq týraly zań jobasyna baılanysty túsindirý jumystaryn bastady, dep habarlaıdy QazAqparat.

15 tamyzda Óskemen qalasynda konferentsııa ótip, onda «Qazaqstan azamattarynyń tólem qabilettiligin qalpyna keltirý jáne bankrottyǵy týraly» Zań jobasynyń máseleleri talqylandy. Sharaǵa qatysqan 200 qatysýshynyń ishinde jeke tulǵalar, qarjylyq keńesshiler, ákimshiler jáne múddeli memlekettik organdar men bankterdiń ókilderi bar.

Kezdesý barysynda spıkerler búgingi tańda Parlament Májilisiniń qaraýynda jatqan zań jobasynyń negizgi erejelerin túsindirdi.

Olar, sondaı-aq halyqaralyq tájirıbeni eskere otyryp, 3 túrli rásimderdi engizýdi qarastyratynyn atap ótti. Birinshi rásim: sottan tys bankrottyq, ony azamattar kelesi jaǵdaılarda qoldana alady:

- bankter, mıkroqarjy uıymdary (MQU) jáne kollektorlar aldyndaǵy borysh, borysh somasy 4,9 mln teńgeden (1600 AEK) aspaýy tıis;

- resmı tabysy joq nemese tabysy eń tómen kúnkóris deńgeıinen aspasa (onyń ishinde asyraýyndaǵy adamdar (otbasy músheleri) da qosa esepteledi), ol adam basyna 36018 teńgeni quraıdy.

Bul rette boryshkerdiń múlki bolmaýǵa tıis jáne bankpen boryshtar boıynsha retteý rásimin júrgizý qajet.

Sottan tys bankrottyqty tek bankter, MQU jáne kollektorlyq agenttikter aldyndaǵy qaryzdar boıynsha qoldanýǵa bolady.

Ekinshi rásim: sot bankrottyǵyn azamattar 4,9 mln teńgeden astam qaryzdar boıynsha jáne boryshtyń qalǵan túrleri boıynsha qoldana alady.

Osy rásim barysynda boryshkerdiń múlki bolǵan jaǵdaıda, ol saýda-sattyqta ótkizilýge jatady.

Túsken qarajat belgilengen kezektilikke sáıkes kredıtorlar aldyndaǵy boryshtardy óteýge jiberiledi.

Úshinshi rásim, bul turaqty tabys bolǵan jaǵdaıda, sotta qaryzdardy tóleýge (5 jylǵa deıin) bólip-bólip tóleý múmkindigin kózdeıtin tólem qabilettiligin qalpyna keltirý rásimi. Qalpyna keltirý jospary qarjy basqarýshysymen birlesip ázirlenedi jáne sotta bekitiledi. Ol úshin eki taraptyń (boryshker men kredıtordyń) kelisimi qajet.

Sondaı-aq, komıtet ókilderi bankrottyqtan keıingi saldary týraly aıtty:

1) jobada 5 jyl ishinde qaryzdar men kredıtter alýǵa shekteý kózdelgen;

2) azamattar bankrottyqty 7 jyldan keıin ǵana qaıta qoldana alady;

3) bankrottyqtan keıin 3 jyl ishinde bankrottyń qarjylyq jaǵdaıyna monıtorıng júrgizý kózdelgen

Sondaı-aq, jobada azamattardyń bankrot dep tanylǵan kúnnen bastap bir jyl ishinde qarjylyq saýattylyqty arttyrý kýrstarynan mindetti túrde ótýi kózdelgen.

Іs-shara sońynda lektorlar konferentsııa qatysýshylarynyń barlyq suraqtaryna jaýap berdi. Azamattardyń usynystary zań jobasyna baılanysty Májilistegi aldaǵy talqylaý barysynda qarastyrylady.

Sonymen qatar, osy aptanyń sońyna deıin osyndaı is-shara Qaraǵandy (16 tamyz), Almaty (17 tamyz), Taldyqorǵan (18 tamyz), Túrkistan (19 tamyz) qalalarynda ótedi.