Jeke adamdardyń bankrottyǵy: Qaryzy barlar qalaı tekseriledi

ASTANA. QazAqparat – QR Qarjy vıtse-mınıstri Erjan Birjanov jeke adamdardyń bankrottyǵyna iligetinderge qatysty tıisti tekserý áreketteri qalaı iske asyrylatynyn túsindirdi, dep habarlaıdy QazAqparat tilshisi.

«Qaryzy bar adamdar ótinim bergennen keıin, memlekettik organdarǵa suraý joldanady. Osy oraıda tıisti málimetti alý úshin 22 baǵyt boıynsha saýal jiberemiz. Onyń arasynda 7 memlekettik organ men 6 uıym bar. Bul mekemelermen arada aqparat almasý retke keltirilgen. Atap aıtqanda, osy derekterge súıene otyryp, zań aıasyndaǵy talaptarǵa saı kelýin tekseremiz. Eger adamdar osy tekserýden ótse, onda 15 kún ishinde onyń ótinimin maquldap, reestrge qosamyz. Bul turǵyda bankrottyq aıasynda ótinimdi qarastyrýdyń kelesi satysyna ótedi», - dedi Erjan Birjanov Ortalyq kommýnıkatsııalar qyzmetindegi baspasóz máslıhatynda.

«Bizdiń portalda ótinim nusqalary ornalastyrylǵan. Adamdar onymen tanysyp, 8 aqpanǵa deıin usynystaryn aıta alady. Jalpy, osy saladaǵy jumystar egjeı-tegjeıli pysyqtaldy jáne aqparttyq júıe de daıyn tur», - dedi vıtse-mınıstr.

Budan buryn habarlanǵandaı, qaryzy jabylmaǵan adamdar 2023 jyldyń 3 naýryzynan bastap bankrottyqqa ótinish bere alady.

Jeke tulǵany bankrot dep taný tártibi qandaı? Kimder ózin bankrot dep jarııalaı alady? Onyń saldary qandaı bolmaq? Osy jáne ózge de suraqtarǵa tolyǵyraq jaýap alý úshin QazAqparat sarapshysynyń materıalyn oqı alasyzdar.