Jeke adam ǵana emes, tutas ult synalatyn kezeń - Ákim Tarazı

NUR-SULTAN. QazAqparat - Adamzat balasy taǵy bir aýyr kezeńdi bastan keshirip jatyrmyz. Bul týraly jazýshy-dramatýrg, Memlekettik syılyqtyń laýreaty Ákim Tarazı aıtty. QazAqparat «Egemen Qazaqstan» gazetine silteme jasap jazýshynyń pikirin tolyq usynady.

***

Adamzat balasy taǵy bir aýyr kezeńdi bastan keshirip jatyrmyz. Mundaı aýyr jaǵdaılardy babalarymyz da basynan ótkergen. Biz Jaratýshy Iemizden árdaıym jeńildik, jaqsylyq tileýshimiz. Alaıda ómirdiń de óz zańdylyqtary bar. Jaqsylyǵyna shúkir ete bilsek, aýyrlyǵyna sabyr ete bilýge týra keledi.

Mundaı qıyn kezeńde ár jeke adam ǵana emes, tutas ult synalady. Qalaı tótep beredi? Qalaı qorǵana alady? Qalaı kúrese alady? Qaıtip jeńedi? Bári – syn. Mundaı alapat syn jetken jurt súrinbeýi múmkin emes. Álemdegi nebir alpaýyt elderdegi jaǵdaı sonyń aıǵaǵy. Tek súringende bir-birimizge súıene bilýimiz kerek. Tabalaspaı, jaǵalaspaı jaǵaǵa shyǵýǵa tıispiz. Aman-esen jaǵaǵa jetsek, aqyldasa otyryp, ketken kemshilikterimizdi túzeýdiń amalyna kósher edik.

Bul indet sóz joq aıylymyzdy jıǵyzdy. Táýbemizge túsirdi. Іsin ońdy júrgize almaıtyn shendiler men shekten tys daraqylyqqa salynyp, ysyrapqa jol berip kele jatqan jurttyń jaǵa-jeńin túzep, aqshany qaıda jumsaýdy, ýaqytty qalaı paıdalanýdy, balalardy qaı baǵytta oqytýdy, bárin-bárin basqasha qarastyrý kerektigi jóninde qazirdiń ózinde úlken oı salýda dep esepteımin. Іs basyndaǵy azamattar men qarapaıym qazaǵymnyń ishinde áli de esh oılanbaı júrgender bolsa, oǵan árıne nalısyń.

Bul indettiń betin júıeli jumys, sanaly tártip qana qaıtara alatynyn kórip otyrmyz. Dári-dármektiń qoljetimdi bolýyna kedergi keltirgen adamdarǵa qatty renjidim. Іshi ergejeıli adam­dar. Óz baýyrlarymyz. Elden, eldiń basshysynan uıalmaı ma eken?

Óz basym halyqtyń qasire­ti­nen qarajat jasaǵan adamdar tóbe kórsetken osyndaı qıyn kezeńde Qasym-Jomart Toqaev sekildi qoly taza, bıik mádenıetti kisiniń Prezı­dent bolyp otyrǵanyna shúkir dedim. «Qaramaısyńdar ma? Uıal­maı­syńdar ma?» dep aıtyp otyr­ǵanym da sondyqtan. Aqyly, ary bar azamattar úlgi alar degen úmit­temin.

Osy indettiń qaramaǵyna ilinip baqılyq bolǵan bar adam­nyń jaqyndaryna kóńil aıtamyn. Qanshama qımasymyz ketti. Jan­dary jánnatta bolǵaı!

Elimiz aman, jurtymyz tynysh bolsyn. Іndettiń beti tezirek qaıtsa eken dep tileı­min. Soǵan barshańyz tártipke baǵynyp, karantın talaptaryn saqtap, at saly­syńyz-
dar.