Jedel járdemniń qyzmetine ózgeris engizildi

ASTANA. QazAqparat - QR Densaýlyq saqtaý mınıstri Eljan Birtanov jedel medıtsınalyq kómek kórsetý erejeleri týraly buıryqqa qol qoıdy. 

Oǵan sáıkes, jedel járdemniń jumysyn barynsha jedeldetý qarastyrylǵan, dep habarlaıdy QazAqparat tilshisi.

«Bizdiń taldaýymyzǵa sáıkes, jedel járdem sozylmaly aýry bar naýqastarǵa qyzmet kórsetemiz dep, ajal aýzynda jatqan adamdardy qutqarýǵa úlgermeı jatady. Sol sebepti jedel járdemge túsken qońyraýlardy naqty tórt topqa bólý uıǵaryldy. Alǵashqy úsheýi shuǵyl áreketti kózdeıdi. Ondaı qońyraýlar dıspetcherlik qyzmette qala beredi. Barlyǵyna jedel medıtsınalyq kómek qyzmet kórsetedi. Al tórtinshi topqa sozylmaly aýrýy bar naýqastar jatady. Bundaı qońyraýlar emhanalardyń janyndaǵy jedel járdemge jiberiletin bolady. Olar da kúni-túni jumys isteıdi. Osylaısha, jedel medıtsınalyq qyzmettiń jumysyn barynsha jedeldetý qarastyrylǵan», - dedi QR Densaýlyq saqtaý vıtse-mınıstri LıazzatAqtaeva búgin Úkimette ótken baspasóz máslıhatynda.

Onyń aıtýynsha, jedel járdemde jumys isteıtin dárigerler men feldsherlerdiń kásibı daıyndyǵyna naqty talaptar qoıylady. Atalǵan másele de mınıstrdiń buıryǵynda kórsetilgen. «Budan bólek, aýdandyq jáne oblystyq jedel járdem qyzmetteri bir júıege qosylyp jatyr. Qazirgi kezde mashınalardy GPS-navıgatorlarmen jabdyqtaý jumysy aıaqtalýǵa jaqyn. Osynyń arqasynda jedel járdem kólikteriniń jyldamdyǵyn baqylaýǵa múmkindik bar», - dep atap kórsetti vıtse-mınıstr.