«Jedel járdemge jedel kómek kerek» - respýblıkalyq basylymdarǵa sholý

ASTANA. 6 qazan. QazAqparat - Qazaq aqparat agenttigi respýblıkalyq basylymdarda 6 qazan, senbi kúni shyqqan ózekti materıaldarǵa sholýdy usynady.

***

Qazaqstan Respýblıkasynyń Prezıdenti N.Á.Nazarbaevtyń «Rossııskaıa gazetada» jarııalanǵan maqalasynyń aýdarmasy «Egemen Qazaqstan» gazetiniń búgingi sanynda «Qazaqstan men Reseı HHІ ǵasyrda: ortaq qundylyqtar negizindegi máńgi dostyq pen odaqtastyq» degen taqyryppen berildi. Elbasy maqalasynda: «Ózimniń jeke saıası tájirıbemdi eskere otyryp, jaqsylyqtarǵa qaraı naq­ty betburystar jasalǵanda qoǵam­nyń bir bóliginde ony jedeldetý tilegi paıda bolatynyn bilemin. Biz búgingi tańda Reseıde jáne basqa kóptegen elderde osyndaı úrdistiń anyq baıqalatynyn kórip otyrmyz. Biraq, barlyq ýaqyttarda jaýapty saıası kóshbasshynyń mindeti kezeń-ke­zeń­men damýdy qamtamasyz ete oty­ryp, buryn  jasalǵandardy búldirip alýǵa jol bermeý, memleket negiziniń beriktigin shaıqaltyp almaý bolyp ta­bylady. Elde turaqtylyq bolmaıynsha, qo­ǵam damı almaıdy. Baıqasańyzdar, bú­gin­gi tańda álemde mundaı mysaldar kóp», - deıdi.

 

Osy basylymnyń jazýynsha, keshe Astanada «Nur Otan» HDP Or­talyq apparatynda Parlament Sena­ty­nyń depýtaty, «Nur Otan» HDP ja­nyn­daǵy Jemqorlyqpen kúres jónindegi respýblıkalyq qoǵamdyq keńestiń tór­aǵasy Oralbaı Ábdikárimovtiń tóraǵalyq etýimen beıne-konferentsııa forma­tyn­daǵy keńes otyrysy ótti. O.Ábdikárimovtiń aıtýynsha, búginde memlekettik satyp alý salasyndaǵy jemqorlyq qylmys­tar jalpy jemqorlyq qylmystar sanynyń 21,2 paıyzyn qurap otyrǵan kórinedi. Máse­len, 2010-2012 jyldary qarjy polıtsııasy memlekettik satyp alý salasynda 1159 jem­qorlyq jáne laýazymdyq qylmysty anyqtap, áshkerelese, olardyń basym kópshiligi, Oń­tústik Qazaqstan oblysynda (143) , Atyraý oblysynda (122), Shyǵys Qazaqstan obly­syn­da (93), Pavlodar oblysynda (77) jáne Astana qalasynda tirkelipti. Tolyǵyraq «Zań buzýshylyqtar tolastamaı tur» degen taqyryptan bile alasyzdar.

***

«Alash aınasy» gazetiniń búgingi sanynda «Maman kóp, besaspap joq» degen taqyryptaǵy  maqalada ınnovatsııalyq-ındýstrııalyq damý baǵytyn ustanǵan elimiz úshin kásibı biliktiligi joǵary maman daıarlaý kún tártibinen túspeýi tıis nómiri birinshi másele ekeni aıtylady. «Alaıda ázirge defıtsıt mamandyqtardyń «taım aýt» alyp turǵan shaǵy demeske amal joq. Qazekem eńbek rynogyndaǵy suranysqa qaramaı, balasynyń kresloda otyryp, kók kóılek kıip, aq jaǵaly atanýy úshin baryn salady desek eshkim jaǵamyzdan ala qoımas. Jaǵasy kirlep, kir jumysty kim isteıdi sonda?»,-  dep jazady basylym. Basylymnyń deregine qaraǵanda, elimizde ekonomıster men qarjyger mamandar nópir bolyp jumys tappaı júrgenine qaramastan, bank salasyna aýadaı qajet maman tapshy. Senseńiz de, senbeseńiz de osy. Qarjyger bolǵanda da eksporttyq qarjylandyrýmen aınalysatyn, ıaǵnı sheteldik qarjy uıymdarymen qoıan-qoltyq jumys isteı alatyn, shet tilin meńgergen istiń kózin taba biletin, qarjy tarta alatyn kásibı qarjygerler tapshy.

 

Resmı málimetterge qaraǵanda, elimizdiń árbir tórtinshi turǵyny jedel járdem qyzmetiniń kómegin paıdalanady. Ásirese, jol apatyna tap bolǵan adamdardyń 80 paıyzy medıtsınalyq kómektiń der kezinde kórsetilmeýinen kóz jumatynyn eskersek jedel járdem qyzmetiniń róli qanshalyqty mańyzdy ekenin aıtýdyń ózi artyq.  Statıstıkalyq derekterge kóz salsańyz, búginde elimizde 5000-nan astam dáriger jetispeıdi eken. Al onyń ishinde asa aýyr halde jatqan adamdarǵa alǵashqy kómek kórsetetin jedel járdem dárigerleriniń jetispeýshiligi janǵa qatty batady. Mine osy jaıt «Alash aınasy» gazetiniń búgingi sanynda jarııalanǵan «Jedel járdemge jedel kómek kerek» degen taqyryptaǵy maqalaǵa arqaý bolǵan.

***

Qazaqstan aqparattyq qoǵamǵa qaraı ilgeri qadam jasap úlgerdi. Aldaǵy birer jydan keıin aýyl men qala arasyndaǵy sandyq teńsizdik joıylady. Memlekettik organdar qyzmetin azamattar men bıznes ókilderi mobıldik qurylǵylar arqyly alatyn bolady. Al sol memqyzmetti kórsetý merzimi kóp degende 2-aq kúnge sozylady. Bul jaıynda «Aıqyn» gazetiniń búgingi sanyndaǵy «Aýyl men qala arasynda sandyq teńsizdik joıylady» degen taqyryptaǵy maqalada keńinen baıandalǵan. Basylymnyń atap ótýinshe, mundaı jaǵymdy jańalyq keshe Astanada Kólik jáne kommýnıkatsııa mınıstrligi qoǵamdyq tyńdaýǵa usynǵan «Aqparattyq Qazaqstan-2020» memlekettik baǵdarlamasynyń jobasyn talqylaý kezinde aıtylǵan.

***

«Qazaqstan men Reseı dostyǵynyń 20 jyldyǵy Reseı astanasyndaǵy Úlken teatrda úlken kontsertpen atalyp ótiledi», - dep jazady «Kazahstanskaıa pravda» búgingi sanyndaǵy «20 let ýspeshnogo partnerstva» degen maqalasynda. Basylymnyń atap ótýinshe, kontsertke eki eldiń tanymal óner ujymdary men ártisteri qatysady. Al qurmetti qonaqtar Prezıdentter Nursultan Nazarbaev pen Vladımır Pýtın bolady.