Jedel járdem júrgizýshileri medıtsınalyq kómek kórsetý protsesine jumyldyrylmaq

ASTANA. QazAqparat - Qazaqstanda shuǵyl medıtsınalyq kómek kórsete alatyn ámbebap kólik júrgizýshilerdi oqytý josparlanyp otyr. Bul týraly QR Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Qyzyǵýshylyq tanytqan júrgizýshilerdi oqytamyz. Óıtkeni barlyǵy birdeı biliktiligin arttyrǵysy kelmeıtini túsinikti. Bul baǵyttaǵy jumystardy iske asyrý úshin bir jyl ýaqyt kerek bolady», - dedi A. Ǵınııat Parlament Májilisindegi Úkimet saǵatynan keıingi baspasóz máslıhatynda.

Osy oraıda mınıstr paramedık shuǵyl medıtsınalyq kómek aıasynda qyzmet etetinin aıtty.

«Álemde jaqsy tájirıbe bar. Jedel medıtsınalyq járdemdi negizinen paramedıkter atqarady. Elimizdegi júrgizýshiler medıtsınalyq protseske qatyspaıtynyn eskere otyryp, biz aldaǵy ýaqytta bul komandanyń múmkindikterin kúsheıtkimiz keledi. Júrgizýshini shuǵyl qyzmet komandasyna qosyp, ony paramedık retinde daıarlaý eskerilgen», - dedi vedomstvo basshysy.

Osy oraıda ol júrgizýshilerdiń jalaqysyna ústemeaqy túrinde yntalandyrý tetigi engiziletinin aıtty.