Jedel járdem kóligin shaqyrtý jaǵdaıy keı óńirde tórt esege artty - mınıstrlik

NUR-SULTAN. QazAqparat – QR densaýlyq saqtaý vıtse-mınıstri Ajar Gınııat jedel járdem kóliginiń jetispeýshiligi máselesi ásirese Almaty, Pavlodar jáne Túrkistan oblystarynda ózekti bolyp otyrǵanyn jetkizdi, dep habarlaıdy QazAqparat tilshisi.

«Elimizde jedel járdem qyzmetin shaqyrtý eki ese, keıbir óńirde tórt ese artty. Buryn jedel járdem qyzmetteri kúnine 15 myń adamǵa qyzmet kórsetetin edi. Sońǵy aptada shaqyrtýlardyń sany eki ese ósip, 30 myńnan asty. Sonyń ishinde KVI boıynsha kúdikpen shaqyrýshylardyń sany 14 paıyzǵa ósti. Osy 14 paıyzdyń 33,7 paıyzy statsıonarlarǵa jetkiziledi. Qalǵan aýrýlar ózderiniń jaǵdaılaryna baılanysty ambýlatorııalyq em alý úshin emhanalarǵa tapsyrylady», - dedi ol OKQ-da ótken baspasóz máslıhatynda.

Vıtse-mınıstrdiń aıtýynsha, Qazaqstanda jedel járdem kólikteri jetkiliksiz.

«Barlyǵy 1967 kólik bar. Almaty, Pavlodar jáne Túrkistan oblystarynda jedel járdem kólikteri standart boıynsha az. Osy problemany sheshý úishn jergilikti atqarýshy organdarmen birlesip, medıtsınalyq qyzmetkerlerdi tasymaldaý, dári-dármekti jetkizý, patsıentterdiń basqa da qajettiligi úshin medıtsınalyq emes memlekettik uıymdardyń avtokólikterin, avtoparkterdiń rezervterin tartý jumystary júrgizilýde. Sonymen qatar mınıstrlik óńirler úshin respýblıkalyq bıýdjetten otandyq óndiristiń 807 avtokóligin satyp alýdy uıymdastyrdy», - dedi ol.

Osy kólikterdiń bári de qyrkúıek aıynyń sońyna deıin oblystardyń bárine taratylady.