Jedel járdem brıgadalarynyń júrgizýshileri marapattaldy

SEMEI. QazAqparat - Abaı oblysynda jedel járdem qyzmetiniń 22 júrgizýshisi «Úzdik avtokólikshi» tósbelgisimen marapattaldy, dep habarlaıdy QazAqparat óńir ákimdigine silteme jasap.

«Úzdik avtokólikshi» tósbelgisi QR Indýstrııa jáne ınfraqurylymdyq damý mınıstrligi Kólik komıtetiniń vedomstvolyq nagradasy.

Abaı obylysynda bul marapatqa jedel járdem qyzmetiniń 22 júrgizýshisi ıe boldy.

«Jedel járdem árbir naýqastyń densaýlyǵy men ómiri úshin uıymdasqan túrde atqarylatyn medıtsına salasyndaǵy óte jaýapty qyzmet. Bul qyzmette júrgizýshilerdiń kásibıligi men ómirlik tájirıbesi synǵa túsip, der ýaqytynda kerekti aýrýhanǵa naýqasty jetkizý mańyzdy», - delingen ákimdik habarlamasynda.
Jedel járdem qyzmetiniń bas dárigeri Vladımır Lı atap ótkendeı, marapatqa laıyqtylardy irikteý barysynda júrgizýshilerdiń jumys ótili, tájirıbesi ǵana eskerilip qoımaı, jumys jáne odan tys ýaqytta jol-kólik oqıǵalarynyń bolmaýy da eskerildi.