Jibek joly aýylynyń tasqynǵa qarsy daıyndyǵy - fotoreportaj
Astana qalasyn tasqyn sýdan qorǵaýǵa arnalǵan bekette ýchaske basshysy Álibek Jaılaýovtyń aıtýynsha, qazir ahýal turaqty ári udaıy baqylaýda tur. Sondyqtan Astana qalasyn sý basý qaýpi joq.
«Bóget tolǵan joq, ıaǵnı 40 paıyzyna sý jınaldy. Jalpy, 450 mln tekshe metr qamtý múmkindigi bar. Dambyǵa kelip jatqan aǵyn sý azaıyp jatyr. Qazir bógetten qalaǵa qaraı sekýndyna 55 tekshe metr jiberilip otyr. Qalanyń ishi de baqylaýda, eshqandaı qaýip joq. Biz Tótenshe jaǵdaılar mınıstrliginiń qadaǵalýymen osy jumystardy rettep jatyrmyz», - dedi Á. Jaılaýov.
Dál qazir Jibek joly aýylynyń shetinde bógesindi nyǵaıtý jumysyna júzdegen adam tartylǵan. Olar negizinen Memlekettik kúzet qyzmetiniń, Tótenshe jaǵdaılar mınıstrliginiń jáne Ulttyq ulannyń qyzmetkerleri. Qum salynǵan qaptarmen aýyl mańyndaǵy 12 shaqyrymǵa sozylǵan bógesindi bıiktetip jatyr.
Bul turǵyda, Jibek joly aýylyndaǵy jaǵdaıǵa qatysty Aqmola oblysy Arshaly aýdany Tótenshe jaǵdaılar bólimi basshysynyń mindetin atqarýshy Oljas Sádýaqasov túsinik berdi.
«Qazir Jibek joly aýylynyń altynshy shaǵyn aýdanynda bógesindi nyǵaıtý jáne uzartý jumystary táýlik boıy úzilissiz iske asyrylyp jatyr. QR Memlekettik kúzet qyzmetinen – 250-ge jýyq adam, Qaraǵandy oblysy Tótenshe jaǵdaılar departamentinen – 30 adam, QR Tótenshe jaǵdaılar mınıstrliginiń Qaraǵandy qalasyndaǵy 52859 áskerı bóliminen – 20 adam, Ulttyq ulannyń 6636 áskerı bóliminen 70 adam jumyldyryldy. Sonymen qatar, 30-ǵa jýyq júk kóligi, qım tıeýge arnalǵan 6 tehnıka, 5 ekskavator jáne 1 býldozer jumys istep tur. Jumys táýlik boıy atqarylyp jatyr, sý deńgeıi turaqty baqylaýda. Jaǵdaı turaqtalǵansha jumys isteımiz. Adamdardy eki aýysymǵa bóldik, ıaǵnı kúndiz 200 adam jáne túnde de 200 adam osy bógesinde bolady. Qazir bógesin ishindegi sý deńgeıi 20-30 sm shamasynda. Bul deńgeıden eki kúnnen beri kóterilmedi», - dep naqtylady O. Sádýaqasov.
Birneshe kúnnen beri Jibek jolynda jergilikti turǵyndar men qaladan kelgen eriktiler kómektesken. Sol jerde shatyr tigip, osy ýchaskede jumys isteıtin adamdardy táýlik boıy ystyq tamaqpen, shaımen qamtamasyz etip otyr.
«Shaǵyn aýdandaǵy turǵyn úılerdi sý basý qaýpi barynsha azaıdy, mundaǵy sý aǵyny da azaıdy. Meniń oıymsha, úılerdi sý baspaıdy. Osynda QR Sý resýrstary jáne ırrıgatsııa mınıstrliginiń mamandary kelip, aýmaqty tekserip shyqty. Olardyń dereginshe, bógesin ishindegi sý bir aıdyń ishinde tartylady», - dedi Arshaly aýdany Tótenshe jaǵdaılar bólimi basshysynyń mindetin atqarýshy.
Óz kezeginde Aqmola oblysy Arshaly aýdany ákiminiń orynbasary Erjan Jolymbetov te aýyldaǵy jaǵdaı turaqty ekenin naqtylady.
«Birneshe kúnnen beri sý deńgeıi ózgermedi. Bastapqyda jergilikti turǵyndar men volonterler kómektesti. Qazir qosymsha kómek qajet emes, adamdar jetkilikti. Eshqandaı qaýip joq, bári óz ornyna keldi. 4 kún ishinde 12 shaqyrym bógesindi nyǵaıtyp, 6-shy jáne 7-shi shaǵyn aýdandy tasqyn sýdan qorǵap qaldyq. Qazir áleýmettik jelilerde qosymsha kómek kerek degen aqparat tarap jatyr. Bul habarlandyrýdyń mazmuny shyndyqqa janaspaıdy. Atap aıtqanda, Jibek jolyna qaraı keletin sýdyń aǵyny azaıdy, biz qum úıilgen bógesindi nyǵaıtyp jatyrmyz», - dedi E. Jolymbetov.
QR Memlekettik kúzet qyzmetiniń bas ınspektory Berik Kantorenovtiń sózine qaraǵanda, bógesindi nyǵaıtýǵa barlyq qajet zattar ýaqtyly jetkizildi.
«Sondyqtan toqtaýsyz jumysymyzdy atqaryp jatyrmyz. Barlyǵy ýaqtyly iske asyrylyp otyr. Munda jergilikti turǵyndar kelip, bári jaqsy ekenine kóz jetkizdi. Endi qaýip joq, Tótenshe jaǵdaılar mınıstrliginiń qyzmetkerleri kelip, sýdyń tereńdigin ólshedi. Osy oraıda sý deńgeıi kún saıyn tómendeıtinin aıtty», - dedi B. Kantorenov.
Jibek joly turǵyny Ǵalııa Sabetova aýyldaǵy úılerdi sý baspaǵanyn, sondaı-aq Tótenshe jaǵdaılar mınıstrligi qyzmetkerleri táýlik boıy jumys istep jatqanyn rastady.
«Qazir kómek bizge emes, Atbasarda sý basqan aýmaqqa kerek. Ol jaqqa shynymen de kómektesý qajet. Jibek joly aýylyna qazir kómekke múlde muqtaj emes, sebebi sarbazdar barynsha jumyldyrylǵan», - dedi ol.