Jazýshy Sáýle Dosjan «Býker» ádebı syılyǵyna úmitker boldy

ASTANA. QazAqparat -  Qazaqstandyq jazýshy Sáýle Dosjannyń aǵylshyn tilinde jaryq kórgen novellalar jınaǵy 2019 jylǵy «The Man Booker International» (London) syılyǵyna úmitkerler tizimine endi, dep habarlaıdy QazAqparat.

Atap aıtqanda, 2018 jyldyń qazan aıynyń basynda «Hertfordshire Press» brıtandyq baspa úıi Sáýle Dosjannyń «The tragedy of abastard» jáne «My own strange heart» atty úzdik  novellalary engen proza jınaǵynyń aǵylshyn tilindegi nusqasyn Halyqaralyq «Býker» ádebı syılyǵyna usynǵan.

Bul rette, jazýshynyń buryn eshqaıda jaryq kórmegen «Thetragedy of a bastard» («Kórdemsheniń qasireti») hıkaıaty brıtandyq retsenzentter tarapynan jaqsy pikirge ıe bolǵan. Tanymal ádebı synshy Kerolaın Ýolton «Ourdear ancestors said honour is more valuable than life» («Bizdiń qasıetti babalarymyz ómirden de qymbat - ar ekenin aıtyp ótken») retsenzııasynda «Kórdemsheniń qasireti» hıkaıatynyń ıdeıasy tereń ekenin atap ótedi. Hıkaıat jeti atadan qan aralastyrmaý saltyn ustanyp kelgen tekti halyq urpaqtarynyń usaqtalyp, azyp bara jatqany týraly ult taǵdyryna qatysty úlken problemany kóteredi.

Sáýle Dosjan - jazýshy, aqyn, jýrnalıst, birneshe ádebı syılyqtyń laýreaty. Sonyń ishinde, jazýshynyń aǵylshyn tiline aýdarylǵan «Ógeı júrek» shyǵarmasy 2017 jyly Shvetsııada ótken Ashyq eýrazııalyq ádebı konkýrsynda «Proza» janry boıynsha júldeli ІІІ oryndy ıelengen.

Jazýshynyń shyǵarmalar jınaǵyn aǵylshyn tiline Elden Sarybaı tárjimalaǵan. Elden Sarybaı «Pero» jeke qorynyń negizin qalaýshy, aqyn-aýdarmashy, saıasattanýshy. 1989 jyly Almaty qalasynda týǵan, London ýnıversıtetinde bilim alǵan.