Jazǵy ýnıversıadadan altyn alǵan Rıta Bakısheva jeńisi jóninde pikir bildirdi

ASTANA. QazAqparat - Qytaıdyń Chendý qalasynda ótip jatqan HHHІ Jazǵy ýnıversıadadan altyn alǵan taekvondoshy Rıta Bakısheva (48 keli) búgingi jeńisi jóninde pikir bildirdi, dep habarlaıdy QazAqparat tilshisi.

Qazaqstandyq sportshy óz salmaǵynda fınalda Qytaılyq Taıbeıden kelgen Hýan In Sýannan basym tústi.

Osylaısha el quramasyna alǵashqy altyn medaldi saldy.

«Maǵan senim artyp, qoldaý bildirgen barshańyzǵa rızashylyǵymdy bildiremin. Aldaǵy ýaqytta da jankúıerlerdi jeńispen qýantamyn degen úmittemin. Bul joly búkil qarsylastarym ońaı bolǵan joq. Árbiriniń jarysqa úlken daıyndyqpen kelgeni baıqalyp turdy. Men altyn alatynyma senimdi boldym. Sol maqsatta óz sheberligimdi kórsete bildim», - dedi Rıta Bakısheva.

Qazirge deıin el quramasy qorjynyna altyn medalden ózge bes kúmis, bes qola júlde tústi.

Kórkem gımnastıkadan Eljana Tanıeva dop pen lentadan eki kúmis medal alsa, qursaýmen saıysta qola júldeger atandy.

Al sporttyq oq atýdan komandalyq saıysta Konstantın Malınovskıı, Islam Sátpaev pen Nıkıta Shahtorın bir kúmis, bir qola aldy.

Sondaı-aq, Nıkıta Chırıýkın (sporttyq oq atý), Dıana Tursynbek (sadaq atý) ekinshi, dzıýdoshylar Suńǵat Jubatqan (66 keli), Asqar Narqulov Asqar (73 keli) jáne Bekarys Sádýaqas (100 keli) úzdik úshtikti túıindedi.

Jazǵy ýnıversıada 28 shilde-8 tamyz aralyǵynda ótedi. Onda 10 sport túri boıynsha 90 qazaqstandyq synǵa túsip jatyr.