Jazǵy Olımpııa oıyndary-2024: Segizinshi jarys kúniniń nátıjesi

<p>ASTANA. KAZINFORM - Týrızm jáne sport mınıstrligi Parıj Olımpıadasynyń kezekti kúniniń nátıjesin jarııalady.&nbsp;</p>

Sporttyq gımnastıka: Narıman Qurbanov sporttyq gımnastıkanyń at snarıadyndaǵy jattyǵýda kúmis júldege qol jetkizdi. Otandasymyz fınalda 15.443 upaı aldy. Osylaısha, Narıman elimizge sporttyq gımnastıkadan Olımpıadanyń alǵashqy medalin syılady.

Mılad Karımı sporttyq gımnastıkanyń erkin jattyǵý fınalynda 14.500 upaı jınap, 5-orynǵa ıe boldy.

Boks: Nazym Qyzaıbaı (50 kg) shırek fınalda Ingrıt Lorena Valensııa Vıktorııany (Kolýmbııa) jeńdi. Endi Nazym fınal joldamasyn Qytaı boksshysymen sarapqa salady.

Stend atý: Stend atýdyń skıt baǵdarlamasynda áıelder arasyndaǵy irikteýdiń alǵashqy jarys kúninde otandasymyz Ásem Orynbaı 67 upaı jınap, 23-satyǵa jaıǵasty.

Skıt baǵdarlamasynyń erler arasyndaǵy irikteýde ulttyq qurama sportshysy Edýard Eşenko 115 upaı jınap, fınalǵa shyǵa almady.

Dzıýdo: Dzıýdodan aralas komandalyq saıysta elimizdiń komandasy Brazılııaǵa jol berdi. Esep: 2-4.

Velosport: Erler arasyndaǵy toptyq jarysta ulttyq qurama sportshysy Alekseı Lýtsenko márege 52-shi bolyp jetti. Onyń ýaqyt kórsetkishi – 6 saǵat, 26 mınýt 57 sekýnd. Jeńimpazdan 7 mınýt 23 sekýnd qalyp ketti. Ókinishke qaraı, Evgenıı Fedorov jarysty orta jolda aıaqtap, márege jete alǵan joq.

Olımpıadanyń segizinshi jarys kúninen keıin Qazaqstan quramasynyń qorjynynda 1 altyn, 1 kúmis, 2 qola júlde bar.