Óz elimde alǵash ret daýys bergenime qýanyshtymyn – álem chempıony Marııa Brovkova

<p>ORAL. KAZINFORM &ndash; Búgin Oral qalasyna qarasty Krýgloozernyı kentindegi № 431 referendým ýchaskesinde baıdarka men kanoe esýden jasóspirimder arasynda eki márte álem chempıony, Azııa oıyndarynyń eki dúrkin júldegeri, eresekter arasynda álem birinshiliginiń qola júldegeri, Parıj Olımpıadasyna qatysqan Marııa Brovkova daýys berdi.</p>

Óziniń aıtýynsha, osyǵan deıingi saılaýda jasy 18-ge tolmaǵandyqtan, bul onyń referendýmǵa alǵash ret qatysýy eken. Eskekshi anasy, jeke bapkeri Elena Brovkovamen birge daýys berdi.

«Óz elimniń damýy úshin daýys bergenime qýanyshtymyn. Qoǵamnyń damýyna árkim óz úlesin qosa bilgeni mańyzdy. Qaı jerde júrsek te, elimiz, týǵan jerimiz esten ketken emes. Oraldaǵy demalysym da bitip qaldy. Tórt kúnnen keıin Tashkent qalasynda ótetin oqý-jattyǵý jıynyna attanamyn. Aldaǵy jyly Azııa chempıonaty, 23 jasqa deıingiler arasynda álem chempıonaty, eresekter arasynda dúnıejúzilik doda sııaqty mańyzdy jarystar bolady. Aldaǵy maqsat bireý – el namysyn abyroımen qorǵap, qaı-qaısysynan da júldemen oralý», - dedi Kazinform tilshisine Marııa Brovkova.

Foto: Batys Qazaqstan oblysynyń ákimdigi

Eske sala keteıik, Marııa Brovkova men Rýfına Iskakova Parıj Olımpıadasynda baıdarka men kanoe esýden 11-oryn aldy. Sondaı-aq buǵan deıin Olımpıadaǵa qatysqan Marııa Brovkovanyń álem chempıonatynyń qola júldesin jeńip alǵanyn jazǵan edik.