Jazǵy demalysta balalardy mýzeılerge, teatrlarǵa, sport nysandaryna tegin aparý usynyldy

<p>ASTANA. KAZINFORM &ndash; Búgin Úkimette balalardyń jazǵy demalysyn uıymdastyrý máselesi pysyqtaldy jáne Premer-Mınıstr Oljas Bektenov demalys sapasyn jaqsartý jóninde óz usynymdaryn aıtty.</p>

«Balalardy, eń aldymen áleýmettik jaǵynan osal sanattaǵy balalardy jazǵy demalyspen qamtý kerek. Demalys kezeńinde balalardyń mýzeılerge, teatrlarǵa, qoryqtarǵa, ulttyq parkter men sport obektilerine tegin barýyn qamtamasyz etý qajet», - dedi O. Bektenov Úkimet otyrysynda.

Sonymen birge, Premer-Mınıstr aýyl balalarynyń bos ýaqytyna erekshe nazar aýdarý keregin aıtýda. Olar úshin sport alańdaryn, damytý ortalyqtaryn jabdyqtap, bos ýaqyttaǵy, mádenı is-sharalardy jáne basqa da sharalardy uıymdastyrý kerek.

«Densaýlyq saqtaý mınıstrligi ruqsat qujattary joq jazǵy saýyqtyrý uıymdarynyń jumys isteýine jol bermeýge tıis. Balalardy tamaqtandyrýdyń sapasyn únemi sanıtarııalyq-epıdemıologııalyq baqylaýda ustaý qajet», - dedi ol.

Al Oqý-aǵartý mınıstrligi Týrızm mınıstrligimen birge ár oblystan keletin balalardyń elimizdiń tanymal týrıstik aımaqtaryna, tarıhı-mádenı mura obektilerine barýy úshin ákimdikterdiń óńiraralyq ózara is-qımylyn úılestirýi qajet.

Buǵan deıin Premer-Mınıstr balalardyń jazǵy demalysyn uıymdastyrýdy synǵa alǵan edi.

Sondaı-aq, balalardy lagerlermen, úıirmelermen, sektsııalarmen, saýyqtyrýmen qamtý boıynsha biryńǵaı elektrondyq platforma qajet ekeni aıtyldy.