Jazdyń ystyǵy ásirese júkti áıelderge aýyr tıip jatyr - dáriger

ANKARA. Anadoly - QazAqparat - Gınekologııa jáne akýsherııa mamany, professor Farýk Býırý júkti áıelderdiń jazdyń ystyǵynda erekshe qınalatynyn aıtady. Óıtkeni aǵzasyna eki ese kóp júk túsedi, dep habarlaıdy QazAqparat Anadoly agenttigine silteme jasap.

Dáriger óz málimdemesinde júktilik kezinde progesteron gormony joǵary bolatyndyqtan dene temperatýrasy 0,3-0,5 gradýsqa artyp, syrtqy ystyq qattyraq seziletinin jetkizdi.

«Aıaǵy aýyr áıelder qosymsha júk kóterip júr. Bul ishindegi nárestege de, jınaǵan artyq salmaǵyna da baılanysty. Sonymen qatar qan kólemi men júrek soǵysy jıiliginiń artýy sekildi júkti áıelderdiń boıyndaǵy keıbir qalypty ózgerister jaǵymsyz saldarǵa ákelýi múmkin. Qyzýy kóterilip-tómendeıdi. Buǵan ystyq aýa raıy qosylǵanda áıel kádimgideı qınalady», - deıdi ol.

Farýk Býırý júkti áıelderge aptapty jaıly ótkizý úshin kóp sý ishýge keńes berdi.

«Tátti jáne gazdalǵan sýsyndardy ishýge bolmaıdy. Bul asqazandy buzady ári artyq kalorııa. Shaı men kofeni kóp ishý de aǵzadaǵy sýdy tez joǵaltýǵa sebep bolady. Júkti áıelderdiń birinshi tańdaýly sýsyny sý bolýy kerek. Jaz aılarynda júkti áıelder aǵzadaǵy sýdy kóp joǵaltady. Ony molynan sý ishý arqyly almastyrý óte mańyzdy. Sondaı-aq olarǵa mıneraldy sý, sút, aıran, tátti emes lımonad, jemis shyrynyn ishýge bolady», - deıdi dáriger.

Júktilik kezinde artyq salmaq jınamaýdyń mańyzyna nazar aýdarǵan Býırý kómirsýdan bas tartyp, jańa pisken jemis-jıdek, kókónis, kók-sókti kóbirek jeýdi usyndy.

Onyń aıtýynsha, júkti áıelder jazdyńgúni saǵat 11.00-16.00 arasynda kóshege shyqpaǵany abzal. Shyǵa qalǵan kúnde kóleńkede júrip, bas kıim kıip, kózildirik taqqany durys.

Aıaǵy aýyr áıel ashyq tústi maqta nemese zyǵyr kıim kıse, ókpesi qysylmaıdy.

Basseın nemese teńizden keıin dymqyl shomylý kıimimen otyrmaǵany jón, áıtpese ınfektsııa juqtyrýy múmkin.

Býırýdyń aıtýynsha, jazda júkti áıelder bastan ótkeretin máseleniń biri - qol men aıaqtyń isinýi.

«Ásirese júktiliktiń sońǵy kezeńderinde tańerteń jáne keshke qol-aıaqtyń isinýi - aıaǵy aýyr áıelderdiń bárinde derlik bolatyn jaǵdaı. Іsiný qan qysymynyń joǵarylaýymen birge júrse, bul ana úshin de, bala úshin de jaǵymsyz saldarǵa ákep soǵýy múmkin. Eń aldymen qan qysymyn jáne zárde albýmın bar-joǵyn tekserý kerek. ıAǵnı, bul aýrýdyń belgisi me, álde patologııa ma, sony anyqtap alǵan durys. Eger bul qalypty isiný bolsa, tuzdy taǵamdardan aýlaq bolý kerek jáne ásirese keshki ýaqytta aıaqty joǵary kóterip jatqan paıdaly», - deıdi professor.