Jazda balalarǵa arnalǵan qandaı konkýrstar ótedi

ASTANA. QazAqparat – Mádenıet jáne sport mınıstri Ashat Oralov Úkimet otyrysynda jazda daryndy balalarǵa arnalǵan qandaı konkýrstar uıymdastyrlatynyn atady, dep habarlaıdy QazAqparat tilshisi.

«Jazǵy demalys kezinde «Temps lié» kásibı horeografııalyq bilim berýdiń halyqaralyq festıvali, «Shabyt», «Astana-Merey» halyqaralyq konkýrstary, «Uly dala urpaqtary» respýblıkalyq qolóner baıqaýy, «Altyn qazyna» jáne «Art-kolonok» balalar shyǵarmashylyǵy respýblıkalyq konkýrstary ótkiziledi.

Memlekettik rámizder kúnine oraı barlyq mektep lagerleri men balabaqshalarynda «Qazaqstan meniń álemimde» asfaltta sýret salý konkýrsy, «Meniń elim Qazaqstan» taqyrybynda túrli konkýrs jáne «Meniń týym – meniń maqtanyshym» fleshmoby josparlanýda», - dedi vedomstvo basshysy.

Mınıstr atalǵan is-sharalar men jobalardyń bári aqysyz bolatynyn atap ótti.

«Bıyl mınıstrlik «Qazaqstan Jastar Fest» sporttyq-jastar festıvaliniń jańa jobasyna bastamashylyq jasady.

VI jazǵy Spartakıada aıasynda «Sporttyq jaz» chellendji bastaý alady. Ataqty sportshylar men sport janashyrlary áleýmettik jelilerde qysqa beınerolıkterdi júkteý arqyly sportpen shuǵyldanýdy nasıhattaıtyn bolady. Sonymen qatar 23 maýsymda elimizdiń barlyq óńirinde elordanyń 25 jyldyǵyn merekeleýge jáne Halyqaralyq Olımpıada kúnine oraılastyrylǵan «Men sportty tańdaımyn!» respýblıkalyq aktsııasy bastalady», - dedi ol.