«Jazasyn ótep shyqqandar túrmege qaıta túspesin desek...» - respýblıkalyq basylymdarǵa sholý

ASTANA. 27 qańtar. QazAqparat - Qazaq aqparat agenttigi respýblıkalyq basylymdarda 27 qańtar, juma kúni shyqqan ózekti materıaldarǵa sholýdy usynady.

***

Álemdegi damyǵan memleketterde «aqyldy qalalar» bar. Qazaqstanda da mem­le­ket­tiń «mıy» sııaqty mindet at­qa­ra­tyn mundaı jobalardy jú­ze­ge asyrý týraly az aıtylyp júrgen joq. Osynaý órshil maqsat - ákimdikterdiń naza­ryn­da, Elbasynyń baqylaý­yn­da. Qazaqstannyń ózinde «aqyl­dy qala» bolýǵa eski astana da, jańa elorda da suranyp tur. Osy rette «Egemen Qazaqstan» gazetiniń jazýynsha, keshe Almaty Innovatsııalyq forý­my aıasynda ІІ Innovatsııalyq konvent ótti. Megapolıs qalanyń bú­kil ǵylymı áleýetin bir jerge to­ǵystyrǵan jáne ǵylym men ón­di­ristiń ózara baılanysyn kór­se­týge baǵyttalǵan konvent qala áki­mi Ahmetjan Esimovtiń tór­aǵa­lyǵymen júrgizildi. Maqala «Aqyldy qala» jobasy» degen taqyryppen berilgen.

***

«Statıstıka agenttigi jarııalaǵan aqparattarǵa qaraǵanda, ótken jyly naqty sektorda sonshalyqty silkinis bola qoımaǵan. Taǵy da qyzmet kórsetýler salasynyń qarqyndy damyǵany bolmasa. Árıne, aýyl sharýashylyǵy salasynda birshama qozǵalystyń bolǵany - azyq-túliktiń keıbir túrleriniń baǵasynyń óspegeninen kórinis tapty», - dep jazady «Aıqyn» gazeti «Naqty sektorda silkinis baıqalmady» degen taqyryptaǵy maqalasynda.  Basylymnyń atap ótýinshe, bul «QazAgronyń» atalǵan sektordy keshendi túrde qarjylandyrýynyń arqasynda júzege asyrylyp otyr.

***

Halyqaralyq túrme reformasynyń keltirgen derekterine qaraǵanda, qazirgi tańda Qazaqstandaǵy qamaýda otyrǵandardyń 49 paıyzy - buryn sottalǵandar. Bul - oń kórsetkish emes. Sondyqtan da osyndaı olqylyqty túzeý maqsatynda jyl basynan «Azamattyq qoǵam men memlekettiń birikken kúsh-jigeri arqyly jazasyn óteýden bosatylǵan azamattardy qaıta áleýmettik beıimdeý men olardyń quqyqtaryn qorǵaý» atty jańa joba júzege asa bastaǵan bolatyn. Osy Halyqaralyq túrme reformasy bas bolǵan jobanyń qyry men syry jýyrda elordada ótken máslıhatta sóz boldy. Alqaly jıynda kóterilgen jaıttarmen egjeı-tegjeıli habardar bolǵyńyz kelse, «Alash aınasy» gazetiniń búgingi nómirindegi «Jazasyn ótep shyqqandar túrmege qaıta túspesin desek...» degen taqyryptaǵy maqalaǵa kóz salyńyz.

 

Byltyrǵy jyldyń 1 shildesinen bastap elimizde «Jumyspen qamtý» baǵdarlamasy júzege asyryla bastaǵany belgili. Onyń maqsaty buryn alǵan mamandyǵyna saı jumys taba almaı júrgen jáne mektep bitirgeli belgili bir kásipke qol jetkize almaǵan adamdarǵa kásiptik bilim berip, jumyspen qamtý, sonymen qatar keı mamandardyń biliktiligin arttyrý edi. Degenmen «Alash aınasy» gazetiniń búgingi sanynda jarııalanǵan «Іri kásiporyndar baǵdarlamaǵa salǵyrt qarap otyr» degen taqyryptaǵy maqalada oryn alyp otyrǵan keıbir keleńsizdikter ashyq baıandalǵan. «Ekibastuz óńirinde atalmysh baǵdarlama qarqyndy ıgerilip jatqanymen, iri kásiporyndardyń oǵan qoldaý tanytar túri kórinbeıdi», - dep jazady basylym.

***

«Kazahstanskaıa pravda» gazetiniń jazýynsha, keshe Qazaqstan Respýblıkasy men Japonııa ara­syn­daǵy dıplomatııalyq qatynastyń ornaǵanyna 20 jyl toldy. Osy dataǵa oraı Elbasy Nursultan Nazarbaevtyń atyna Japonııa Premer-mınıstri Noda Esıhıkodan quttyqtaý hat kelgen. Onda bylaı delingen: «Asa qurmetti Nursultan Ábishuly! Qazaqstan men Japonııa arasyndaǵy dıplomatııalyq qatynas­tyń ornaǵanyna 20 jyl tolý oqıǵasyna oraı meniń shyn júrekten shyqqan quttyqtaýym­dy qabyl aly­ńyz. Qazaqstan óz táýelsizdigine qol jetkizgennen keıin bizdiń elderimizdiń ara­syn­da óte jaqsy qa­rym-qatynas qa­lyp­tasty. Buǵan byltyrǵy naý­ryz aıynda Japonııanyń shyǵy­syn­da bolǵan surapyl zilzala kezinde bizge kóńil aıtqan jyly sózderińiz ben qoldaýyńyz, son­daı-aq Sizdiń atyńyzdan jáne kóp­tegen basqa da qazaqstan­dyq­tar tarapynan kórse­til­gen kómek aıǵaq bolyp tabylady. Osy sátti paıda­la­nyp, men taǵy da ózimniń rızashylyǵymdy bildirgim keledi».