Jaz kúnderi qostanaılyqtardyń ormanǵa barýyna tyıym salyndy
02:00, 05 Maýsym 2023
QOSTANAI. QazAqparat – Qostanaı oblysynyń ákimi Qumar Aqsaqalov «Órt qaýpi joǵary kezeńde jeke tulǵalardyń ormanda bolýyna shekteý engizý týraly» qaýlyǵa qol qoıdy, dep habarlaıdy QazAqparat tilshisi.
«Órt qaýpi joǵary kezeńde jeke tulǵalardyń ormanda bolýyna jáne oǵan kólik quraldarymen kirýine, sondaı-aq Qostanaı oblysynyń memlekettik orman qory aýmaǵynda qurylys jumystary, paıdaly qazbalar óndirý, kommýnıkatsııalar tartý jáne barlyq orman daqyldary jumystary men orman sharýashylyǵyn júrgizý shektelsin», - delingen ákim qaýlysynda.
Qujat 12 maýsymnan bastap kúshine enedi.
Eske sala keteıik, byltyr qyrkúıekte Qostanaı oblysyna qarasty Áýlıekól aýdanyndaǵy orman alqabynda alapat órt boldy. Birneshe kúnge jalǵasqan tilsiz jaý saldarynan 2 091 adam evakýatsııalanyp, 12 turǵyn túrli jaraqat aldy, 1 adam qaza tapty.
Sonymen qatar, Amanqaraǵaı aýylynda 98 úı órtenip ketti.