Jaz boıy 60-qa jýyq kitap oqyǵan pavlodarlyq oqýshylar velosıped utyp aldy
Pavlodar qalasynyń ortalyqtandyrylǵan kitaphanalar júıesi «Úzdik oqyrman» baıqaýynyń jeńimpazdaryn marapattady.
Baıqaý 12 sáýir men 1 qyrkúıek aralyǵynda ótti. Oǵan qatysýshylar 7-den 15 jasqa deıin jáne 16 jastan joǵary bolyp eki topqa bólindi.
Pavlodar qalasynyń ortalyqtandyrylǵan kitaphanalar júıesi dırektorynyń orynbasary Aıbek Oralhan baıqaýǵa 100-ge jýyq adam qatysqanyn atap ótti.
« Baıqaý bizdiń júıege qaraıtyn 13 kitaphana arqyly júrgizildi. Qalalyq oqyrmandar men qala mańyndaǵy aýyldardyń oqyrmandary qatysty. Ekinshi kezeńge 15 kitaptan joǵary oqyǵan 34 oqyrmandy iriktep aldyq. Bizden kitap alǵan kezde formýlıarynda kitaptardyń tizimi men avtorlary jazylady « , - dedi Aıbek Oralhan.
Qatysýshylardyń ishinde eń kóp kitap oqyǵan - zeınetker Qýat Shýaqbaev. Ol 109 kitap oqyǵan. Biraq ol densaýlyǵyna baılanysty ekinshi kezeńge qatysýdan bas tartqan.
« Eresekter arasynda kóbine zeınetkerler qatysty. 80-ge jýyq kitap oqyǵandar bar. Biraq olar ekinshi kezeńge qatysýdan bas tartyp, syılyqty jastarǵa berýdi uıǵardy. Sondyqtan eki velosıped te oqýshylarǵa buıyrdy « , - dedi Aıbek Oralhan.
Aıbek Oralhannyń aıtýynsha, júldegerlerdi anyqtaý kezinde tizimdegi kitaptar sany emes, naqty oqyǵan kitaptar esepke alynǵan.
« Baıqaý barysynda baıqaǵanymyz - keıbir oqyrmandarymyz kitaptardy otbasy múshelerine, kórshilerine alady eken. Mysaly, 30 kitap alsa, onyń 10-yn ǵana ózi oqıdy. Ekinshi kezeńde belgili jazýshylardan quralǵan qazylar alqasy baıqaýǵa qatysýshylarǵa suraqtar qoıyp, naqty kitap oqyǵandardy anyqtady. Іshindegi basty keıipkerler, sıýjetter boıynsha, tipti kitaptyń muqabasynyń túsin de surap jatty. Jalpy, kitapty oqyǵan adam belgili bolady. Suraqtarǵa múdirmeı jaýap beredi. Sondyqtan naqty oqylǵan kitaptardyń sany esepke alyndy « , - dedi Aıbek Oralhan.
Baıqaý qorytyndysy boıynsha eń jas oqyrmandardyń biri 25 kitap oqyǵan №8 lıtseıdiń 2-synyp oqýshysy Ignat Gaısın trıýktik samokat jeńip aldy.
Sondaı-aq 59 kitap oqyp, solardyń mazmuny boıynsha múdirmeı jaýap bergen qalalyq №35 mekteptiń 6-synyp oqýshysy Berdibek Jánibekuly men 30 kitap oqyǵan Kenjekól orta mektebiniń 4-synyp oqýshysy Beksultan Samıǵa velosıped ıegerleri atandy.
Jeńimpazdardyń biri Berdibek Jánibekuly kúnine kitap oqýǵa 2-3 saǵat arnaıtynyn atap ótti.
« Baıqaýǵa otbasymyzben birge qatystyq. Anam men ákem, baýyrym men qaryndasym da kitap oqydy. Ózim 59 kitap oqydym. Іshinde Berdibek Soqpaqpaevtyń «Meniń atym Qoja» kitaby unady. Qojanyń oqýshylyq beınesin jaqyn tuttym « , - deıdi Berdibek Jánibekuly .
Qalalyq ortalyqtandyrylǵan kitaphanalar júıesi oqyrmandardy yntalandyrý jumystaryn toqtatpaıtynyn atap ótti. Aldaǵy ýaqytta Ahmet Baıtursynulynyń 150 jyldyǵyna arnalǵan beınerolıkter baıqaýynyń qorytyndysy shyǵarylady. Onda oqyrmandar oqyǵan shyǵarmalarynyń negizinde beınerolık daıyndaıdy.