Jaz bastalǵaly Túrkistan oblysynda 31 adam sýǵa ketken, 19-y — bala

<p>TÚRKІSTAN. KAZINFORM- Túrkistan oblysynda jyl basynan beri 19 bala sýǵa ketken. Bul týraly oblystyq TJD azamattyq qorǵanys basqarmasynyń basshysy Orazgeldi Nurmahanuly málimdedi.</p>

Onyń aıtýynsha, Túrkistan oblysy aýmaǵynda 2024 jylǵy jazǵy shomylý maýsymyn qaýipsiz ótkizý jáne qaıǵyly jaǵdaılardy boldyrmaý maqsatynda birshama jumys atqarylyp jatyr. 

Atap aıtqanda, barlyq aýdan-qalalarda ata-analarmen kezdesý uıymdastyrylyp, túsindirý jumysy júrgizilgen. 

Sondaı-aq, sýdaǵy qaýipsizdik boıynsha semınarlar men ashyq sabaqtar ótkizildi. 

«Jalpy shomylý maýsymy bastalǵaly beri sýǵa ketý faktisi boıynsha 31 jaǵdaı tirkelgen bolsa, onyń 19-y — jas balalar. Arnaıy shomylatyn orny joq eldimekenderde jergilikti ákimdik tarapynan jáne kásipkerler esebinen modýldi-karkasty basseınder satyp alynyp, tegin ári qaýipsiz shomylýǵa múmkindik jasalyp jatyr. Qazirgi tańda jalpy karkasty basseınder sany 151-ge jetip otyr. Budan bólek, jyl basynan beri 2 myńnan asa reıd uıymdastyrylyp, ózender men kanaldardyń boıynda turatyn turǵyndarǵa jadynama taratyldy», — dedi Orazgeldi Nurmahanuly. 

Brıfıng sońynda spıker oblys turǵyndary men qonaqtaryn sýda shomylý erejelerin qatań saqtaýǵa shaqyryp, jas balalardy qaraýsyz qaldyrmaý kerektigin eskertti.