Jaıyn men kókserke balyqtaryn eksporttaýǵa tyıym salynbaq

ASTANA. QazAqparat – Qazaqstan aýmaǵynan muzdatylǵan jaıyn men kókserke balyqtaryn áketýge tyıym salynýy múmkin. Bul týraly ashyq talqyǵa shyǵarylǵan Balyq sharýashylyǵy komıteti tóraǵasynyń buıryǵynda jazylǵan, dep habarlaıdy QazAqparat tilshisi.

«Jańa muzdatylǵan nemese salqyndatylǵan jaıyn jáne kókserke balyqtaryn shyǵarýǵa 6 aı merzimge tyıym salý engizilsin», - deligen qujatta.

Buıryqqa qosymsha túsindirmede bul - balyq shıkizaty tapshylyǵyn boldyrmaý maqsatynda qabyldanyp otyrǵany jazylǵan.

«Statıstıka derekteri boıynsha óńdelmegen balyq eksportynyń jalpy balyq eksportyndaǵy úlesi 55%. Byltyr barlyq óńdeý kásiporyndarynyń jalpy óndiristik qýaty 31,2 myń tonna balyqty óńdedi. Buryn bul meje jylyna 142 myń tonnaǵa jýyq bolatyn. ıAǵnı, byltyr kásiporyndardyń júktemesi 22%-dy qurady. Kásiporyndardyń jumys istemeýniń sebepteriniń biri balyq shıkizatynyń jetispeýshiligi. Osy másele boıynsha Ekologııa jáne tabıǵı resýrstar mınıstrligi balyq sharýashylyǵy sýbektilerimen, bıznes ókilderimen jáne barlyq múddeli taraptarmen shekteýler engizý máselesin talqylaý boıynsha birqatar keńes ótkizdi.

Osyǵan baılanysty talqylaý barysynda aıtylǵan kásipkerlerdiń pikirin eskere otyryp, bastapqy kezeńde 6 aı merzimge Qazaqstan aýmaǵynan eksporttaǵy úlesi 10%-dan az jańa muzdatylǵan balyqtardyń eksportyn shekteý usynylady. Bul jaıyn men kókserkege qatysty», - dep túsindirme berilgen buıryqqa.

Qujat 14 naýryzǵa deıin kópshilik talqylaýda bolady.