Jaıylymdyq jerler 100 mln gektarǵa deıin keńeıtiledi - Úkimet saǵaty

ASTANA. QazAqparat -  Qazaqstanda jaıylymdar alańy 58 mln gektardan 100 mln gektarǵa keńeıtiledi. Bul týraly Májilistegi Úkimet saǵatynda  QR Premer-Mınıstriniń orynbasary-Aýyl sharýashylyǵy mınıstri Ómirzaq Shókeev málim etti, dep habarlaıdy QazAqparat tilshisi.

Atap aıtqanda, Ó. Shókeev 2017-2021 jyldarǵa arnalǵan AÓK-ni damytý baǵdarlamasyna túzetýler engizý taqyrybynda baıandama jasady. Bul oraıda birneshe salalyq baǵdarlamalar qamtylmaq.  

«Etti mal sharýashylyǵyn damytý jobasynyń negizin otbasylyq shaǵyn fermalar quraıdy. Ol fermerlik sharýashylyqtardan, bordaqylaý alańdarynan jáne qazirgi zamanǵy et óńdeý keshenderinen turatyn ıakorlyq kooperatsııa túrinde iske asady. Bul jerde AQSh, Kanada men Avstralııanyń tájirıbesi negizge alynady. Aldaǵy 10 jylda iri qara mal sharýashylyǵymen, qoı jáne jylqy sharýashylyǵymen aılanysatyn 80 myńnan astam otbasylyq ferma qurý, jaıylymdar alańyn 58 mln gektardan 100 mln gektarǵa keńeıtý, iri qara mal sanyn 15 mln basqa deıin, qoı sanyn 30 mln basqa deıin ulǵaıtý kózdelip otyr», - dep atap ótti Ómirzaq Shókeev.

Jobaǵa qatysýshylarǵa qoldaý kórsetiledi. Osy oraıda jer ýchaskelerin berý, sondaı-aq mal, tehnıka jáne jabdyq satyp alýǵa jeńildikpen nesıe berý, jaıylymdarǵa ınfraqurylym jetkizý eskeriledi.

Mınıstrdiń sózine qaraǵanda, sútti mal sharýashylyǵy jobasy da otbasylyq fermalardan, taýarly sút fermalarynan jáne zamanaýı sút zaýyttarynan turatyn ıakorlyq kooperatsııa prıntsıpi boıynsha júzege asady. 2027 jylǵa qaraı otbasylyq fermalardyń sanyn 380-nen 930-ǵa deıin, iri taýarly sút fermalarynyń sanyn 108-den 170-ge deıin, sút zaýyttarynyń sanyn 163-ten 174-ke deıin jetkizý josparlanǵan. Osynyń nátıjesinde, sút óndirisiniń kólemi 1 mln tonnaǵa deıin ulǵaıtý mindeti qoıylyp otyr.

Foto: altai-photo.ru