Jaıylymdardy jaqsartýǵa baǵyttalǵan memlekettik qoldaý normalary qarastyrylyp jatyr

ASTANA. QazAqparat – Parlament Májilisiniń depýtattary «Qazaqstan Respýblıkasynyń keıbir zańnamalyq aktilerine jaıylymdardy paıdalaný máseleleri boıynsha ózgerister men tolyqtyrýlar engizý týraly» zań jobasyn talqylaıtyn bolady, dep habarlaıdy QazAqparat tilshisi.

«Atalǵan zańynyń jobasyn Parlament depýtattary ázirledi. Bul qujat Jer jáne Orman kodeksterine, «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» jáne «Jaıylymdar týraly» zańdaryna ózgerister men tolyqtyrýlar engizýdi kózdeıdi», - dedi Májilis depýtaty Berik Ospanov palatanyń jalpy otyrysynda.

Zań jobasynyń maqsaty - jaıylymdardy basqarý jáne paıdalaný salasyndaǵy qoldanystaǵy zańnamany jetildirý.

«Atap aıtqanda, jaıylymdyq jerlerdi paıdalanbaǵany úshin tıis is-sharalar kúsheıtilip, halyqtyń qajettiligine arnalǵan jaıylymdardy aýyl sharýashylyǵy maqsatyndaǵy jerlerdiń basqa túrlerine aýystyrýǵa tyıym salynady. Jaıylymdardy basqarý jáne paıdalaný jónindegi jospardyń mazmuny men merzimderi ózgertiledi, ýákiletti organdardyń quzyretteri naqtylanady, sondaı-aq shalǵaıdaǵy jaıylymdardy sýarýǵa jáne jaıylymdardy jaqsartýǵa jumsalatyn shyǵyndardy sýbsıdııalaý arqyly jaıylym paıdalanýshylardy memlekettik qoldaý normalary qarastyrylǵan. Májilistiń Agrarlyq máseleler komıteti zań jobasy boıynsha qorytyndy ázirleýge daıyn», - dedi depýtat.