Jaıylymdarda qudyq qazýǵa 22 mlrd teńge bólinbek - AShM

ASTANA. QazAqparat - Qazaqstanda jaıylym jerlerdi sýlandyrý úshin qazylatyn 3500 qudyqtyń qurylysyna 22 mıllıard teńge bólinedi. Bul týraly «Nur Otan» partııasynyń Ortalyq apparatynyń keńesinde «Agrarlyq sala» baǵyty boıynsha ótken komıtet otyrysynda QR Aýyl sharýashylyǵy vıtse-mınıstri Erlan Nysanbaev málim etti, dep habarlaıdy «QazAqparat» HAA tilshisi.

Vıtse-mınıstr jaıylym jerlerdiń qunarynan aıyrylyp, shólge aınala bastaýynyń bir sebebi júıesiz qoldaný, jaıylymdyq aınalymnyń bolmaýy, jaıylymdy alqaptardyń jaǵdaıyn jaqsartý baǵytynda jumystyń júrgizilmeýi sebep bolyp otyrǵanyn aıtady.

«Jaıylym jerlerdi sýlandyrý úshin memlekettik baǵdarlamaǵa sáıkes jumys júrgizilip jatyr. Naqtyraq aıtqanda, 18 mıllıon gektar aýmaqqa 3500 qudyq qazý kózdelgen. Bul baǵytta 22 mıllıard teńge bólý qarastyrylǵan. Osy jumys sátti júzege asqan jaǵdaıda Qazaqstandaǵy sýlandyrylǵan jaıylym jerlerdiń aýmaǵy 60 mıllıon gektarǵa jetedi», - deıdi Erlan Nysanbaev.

Vıtse-mınıstr kelesi jyly 722 qudyqtyń qurylysy júrgiziletinin atap ótti.

Belgili bolǵandaı, Qazaqstanda qazirgi tańda aýyl sharýashylyǵy qoldanysynda 70 mıllıon gektar jaıylym jer bar. Turǵylyqty mekenderdegi jaıylym jerdiń aýmaǵy - 20,8 mıllıon gektar. Buǵan qosa qosymsha taǵy 76,8 mıllıon gektar jaıylym jer rezervte tur.