Jaıylym jerlerin alyp qoıý normatıvi ózgeredi

ASTANA. QazAqparat – Májilis depýtaty Nurjan Áshimbetov palatanyń jaıylym jerlerdi bólýge qatysty ózerister engizetin jumys tobyna basshylyq jasaıtyn boldy, dep habarlaıdy QazAqparat tilshisi.

«Zań jobasy «Qazaqstan Respýblıkasynyń keıbir zańnamalyq aktilerine jaıylymdardy paıdalaný máseleleri boıynsha ózgerister men tolyqtyrýlar engizý týraly» dep atalady jáne birneshe zańdy – Jaıylymdar týraly zańdy, Orman, Jer kodeksterin qamtıdy. Negizgi problemanyń biri – bul jaıylymdardy alyp qoıý. Qazirgi ýaqytta qoldanystaǵy norma eger mal basy normatıvtiń 20 paıyzyn qurasa, onda ıesinen jaıylymdy alyp qoıýǵa múmkindik bermeıdi. Biz muny 50 paıyzǵa deıin jetkizgimiz keledi», - dedi Nurjan Áshimbetov agenttik tilshisine bergen suhbatynda.

Osy rette depýtat naqty mysal da keltirip ótti.

«Máselen, Aýyl sharýashylyǵy mınıstrligi bekitken normatıvke sáıkes, 800 gektar jaıylym jeri bolǵan kezde onda 100 bas mal bolýy tıis. Jáne de eger menshik ıesinde tym bolmaǵanda 20 bas mal bolsa, onda jaıylymdy alyp qoıýǵa bolmaıdy. Biz muny ádiletsiz dep sanaımyz ári atalǵan kórsetkishıi 50 paıyzǵa deıin jetkizý qajet. Eger norma qabyldansa, onda ondaǵan mln gektar jaıylym jer qaıta bólýge túser edi», - dedi Májilis depýtaty.

Onyń atap ótýinshe, Jer kodeksinde 26-bap bar. Oǵan sáıkes, jer 5 jyldyq merzimge konkýrssyz beriledi.

Muny jergilikti atqarýshy organdar paıdalanyp otyr.

«Bul ýchaskeler «qajetti» adamdarǵa konkýrssyz 5 jylǵa beriledi. Al qarapaıym adamdar mundaı jaıtty bilmeıdi, keıde jer konkýrsqa shyǵarylmaıdy da. Biz bul bapty alyp tasaǵaymyz nemese jastarǵa ǵana paıdalanyp, aýmaǵyn 500 gektarǵa deıin shektegimiz keledi. Buǵan qosa, aýyl sharýashylyǵy qajettiligi úshin «jer qory» túsinigin engizgimiz keledi. Búginde eldi mekender tóńiregindegi jaıylym jerdiń jetispeýshiligi úlken problemaǵa aınalǵan. Bul jerlerde qaıtarý da qıyn. Eldi mekenniń dál janynda bolýy mindetti emes. Ol sál alysyraq bolýy da múmkin. Túpki máni mynada - jerdiń sol bóligi konkýrsqa shyǵarylmaıdy, ol aýyldyq ákimdikke bekitiledi. Jáne de jergilikti qoǵamdstyq jınalys barysynda osy jerdi paıdalaný máselesin sheshedi», - dedi Nurjan Áshimbetov.

Jalpy, zańnamaǵa 41 túzetý engizý josparlanyp otyr.

«Jumys toby jasaldy. Biraq bul zań jobasyn aldaǵy 2 aıdyń ishinde Májilistiń jalpy talqylaýyna shyǵarǵymyz keledi. Jumys tobynda jergilikti atqarýshy organdar men ınspektsııanyń ókilderi, fermerler, sarapshylar, belsendiler bar», - dedi depýtat.