Jaıylym jer barlyq oblysta jetispeıdi – AShM
«Prezıdenttiń tapsyrmasy boıynsha óńirlerde paıdalanylmaı jatqan jaıylymdyq jerdiń kólemderi anyqtalyp jatyr. 2019 jyldyń qarasha aıynda mınıstrlik aýyl turǵyndaryna arnalǵan men aýyl sharýashylyǵy salasyndaǵy kásiporyndardyń atyna tirkelgen jaıylym jerlerge jiti taldaý jumystaryn aıaqtaǵan edi. Aýdandar men aýyldyq okrýgterdegi jaıylymǵa túsetin normatıvti júktemeler mal sanymen salystyra esepteldi», - dedi Rústem Qurmanov aýyl sharýashylyǵy mınıstrliginiń alqa májilisinde.
Taldaý jumystary kórsetkendeı, búkil oblystaǵy qarapaıym halyq úshin, ásirese ońtústiktegi óńirlerde jaıylym jerdiń jetispeıtini anyqtalyp otyr. Onyń ústine qazirgi sharýa qojalyqtardyń atyna tirkelgen 72,4 mln ga aýmaqtyń jartysyna jýyǵy mal basynyń jetkilikti sanymen qamtylmaǵan.
«Osyǵan baılanysty mınıstrlik halyqqa jaıylym jerdi bólý boıynsha oblys ákimderiniń atyna tıisti hattardy joldady. Nátıje de bar. Jyl basynan beri memlekettiń menshigine 1,8 mln ga jaıylym jer qaıtaryldy. Bul baǵyttaǵy jumys jalǵasyn tabady», - dedi vıtse-mınıstr.
Sonymen qatar 2019 jyly AShM jer resýrstaryn basqarý boıynsha komıtet jer zańnamasynyń saqtalýyn qadaǵalaý jumystary aıasynda sot arqyly memleket menshigine paıdalanylmaı jatqan 1,2 mln ga jerdi, 37 myń ga egindik alqabyn, 1163 myń ga jaıylym jerdi qaıtarǵan.
«Atalǵan jerdi jańa jer paıdalanýshylarǵa taratyp, aýyl sharýashylyǵy aınalymyna engizý jumysy jalǵasýda», - dedi ol.
Eske sala ketsek, buǵan deıin Aýyl sharýashylyǵy vıtse-mınıstri Rústem Qurmanov Soltústik Qazaqstan men Aqmola oblystaryndaǵy paıdalanylmaı jatqan jerge ǵarysh arqyly júrgizilgen aýdıttiń qorytyndysyn jarııalap, bul jumys bıyl basqa oblystarda jalǵasatynyn málim etken edi.
1