Jaıyqtyń tabanyn tereńdetýge Úkimet rezervinen aqsha bólý kerek – depýtat

ASTANA. QazAqparat – Májilis depýtaty Sálimjan Naqpaev Premer-Mınıstrdiń orynbasary – Qarjy mınıstri Erulan Jamaýbaevqa saýal joldap, Jaıyq ózeniniń tabanyn tereńdetýge qarajat bólýdi surady, dep habarlaıdy QazAqparat tilshisi.

«2018 jyldan bastap Jaıyq ózeniniń arnasynda, ásirese, Kaspıı teńizine quıatyn saǵasynda sý deńgeıiniń kúrt tómendegeni baıqalady. Qazirgi tańda teńizge quıatyn tustyń tereńdigi nebári 40-50 sm bolyp qalǵan», - dedi depýtat.

Aıtýynsha, osynyń kesirinen 5000-ǵa jýyq balyqshynyń basyn qosqan 800-ge jýyq balyq aýlaýshy brıgada Kaspııge shyǵa almaı qalǵan.

«Bul balyq aýlaý lımıtin oryndamaýǵa jáne jergilikti qazynaǵa salyqtyń túspeýine ákeledi. ıAǵnı, eń negizgisi – balyqshylardy jalǵyz tabys kózinen aıyrady. Bul jaǵdaı jaǵalaý kúzeti kemeleriniń teńizge kirip-shyǵýyna eleýli qıyndyq týǵyzady. Jaıyq ózenindegi sý deńgeıiniń 1,4 metrlik shekti belgiden tómen túsip ketýi munaı tógilgen jaǵdaıda mamandandyrylǵan kemelerdiń ótýine múmkindik bermeıtin jaǵdaıǵa alyp keledi. Úkimet saǵaty kezinde bizge jyl saıyn tereńdetýge qarajat bólinetini habarlandy. Biraq bul jumystyń nátıjesi ózenniń taıazdanýyna ákeldi. Demek atqarylǵan jumys tıimsiz bolyp otyr», - dedi Májilis depýtaty.

Osyndaı qaterlerdi ataǵan depýtat máseleni sheshý úshin Úkimet rezervinen qarjy bólý kerek dep otyr.

«Osyǵan baılanysty joǵaryda aıtylǵandardyń negizinde jaǵdaıdy odan ári apatqa ushyraýyna jol bermeý maqsatynda shuǵyl shara qabyldaý múmkindigin qaraýdy jáne Jaıyq ózeniniń saǵasyndaǵy túbin tereńdetý jumysyna Úkimettiń rezerv qorynan qarajat bólýge qoldaý kórsetýdi suraımyz», - dedi Sálimjan Naqpaev.