Jaıyq popýlıatsııasynan 80 myń bas kıikti atý týraly sheshim shyqty – Serikqalı Brekeshev

NUR-SULTAN. QazAqparat – Ekologııa, geologııa jáne tabıǵı resrýstar mınıstri Serikqalı Brekeshev Jaıyq popýlıatsııasyna jatatyn 80 myń bas kıikti atý týraly sheshim qabyldanǵanyn málim etti, dep habarlaıdy QazAqparat tilshisi.

«Bıologııalyq negizdeme aıaqtaldy. Ǵalymdar kıik sanyn retteýdiń qajettiligi bar degendi aıtyp otyr. Bul Jaıyq popýlıatsııasyna qatysty bolady. Qazir bul popýlıatsııanyń sany 800 myń bastan asady desek, sonyń 10 paıyzy, ıaǵnı 80 myń bas kıik retteýge jatady», - dedi mınıstr Májilistiń plenarlyq otyrysynan keıin BAQ ókilderiniń saýalyna bergen jaýabynda.

Jýrnalısterge bergen jaýabynda Serikqalı Brekeshev «kıik sanyn retteý» dep negizinen olardy atý týraly aıtylǵanyn naqtylady.

Sondaı-aq, ol kıik sanyn retteý sharalary popýlıatsııalardyń sanyn shektep ustaý degendi bildirmeıtinin eskertti.

«Onyń ishinde keıbir popýlıatsııalardyń sanyn kóbeıtý de kózdelgen. Retteý degen kıik sanyn ustap turý ekenin qaıtalap aıtamyn. Retteý degennen keıin belgili bir normalar bar ekeni túsinikti. Bul qajetti shara. Aýyl sharýashylyǵy janýarlarymen qaıshylyqtar bolmaý úshin osylaı isteý kerek. Búgingi tańda Batys Qazaqstan oblysynda kıikter jaıylymdarǵa ǵana emes, egin alqaptaryna da kirip jatyr. Sondyqtan bir jaǵynan problema da bar. Tipti bıologııalyq negizdeme boıynsha kıikterdiń ońtaıly sany emin-erkin tirlik keshe alatyn kólemge jetýi kerek. Osy negizdemelerdiń aıasynda retteý júrgiziledi. Búgingi tańda biz 500-ge deıin kıikti zertteý úshin alamyz», - dedi vedomstvo basshysy.