Jaıyq ózeniniń jaǵdaıy Qazaqstan men Reseı yntymaqtastyq forýmynda talqylanady

NUR-SULTAN. QazAqparat – Kókshetaýda ótetin Qazaqstan men Reseıdiń shekaralyq yntymaqtastyq forýmynyń basty taqyryby – Jaıyq ózeniniń jaıy bolmaq. Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev Batys Qazaqstan turǵyndarymen onlaın-kezdesý barysynda málim etti, dep habarlaıdy QazAqparat.

«Kókshetaýda qarasha aıynda ótetin Qazaqstan men Reseı shekaralas yntymaqtastyq forýmynda Jaıyq ózeniniń problemasyna basymdyq beriledi. Biz Reseıge birneshe ret baryp, osy máseleni kótergen bolatynbyz», - dedi Maǵzum Myrzaǵalıev.

Onlaın-kezdesýge qatysqan QR Ekologııa, geologııa jáne tabıǵı resýrstar mınıstrligi transhekaralyq ózender departamentiniń dırektory Álııa Shalabekova ózenge gıdrologııalyq zertteý júrgizý boıynsha reseılik áriptesterimen ýaǵdalastyqqa qol jetkizilgenin málim etti.

Sonymen birge atalǵan zertteýler aıasynda ózenniń gıdrotehnıkalyq qurylymyn da zertteý kózdelip otyr.

Kezdesý barysynda óńir turǵyndary mınıstrliktiń ókilderimen birge aımaqtyń ekologııalyq problemalaryn sheshýge arnalǵan Jol kartasynyń jobasyn talqylady. Jospar óńirdiń ekologııasyn jaqsartýǵa baǵyttalǵan 20 shaqty sharadan turady. Oǵan memlekettik orman qorynyń aýmaǵyndaǵy jasyl jelekti 2025 jylǵa deıin 782 gektardan 1200 gektarǵa arttyrý, jolaýshylar avtokóligine dızeldik otyndy paıdalanýǵa tyıym salý, oblystyń óndirisine qaldyqtardy baqylaýdyń avtomatty júıesin engizý sharalary enedi.

Jol kartasy halyqtyń usynystary negizinde eki aptanyń ishinde tolyqtyrylady.