Jaıyq ózeniniń taǵdyry qalaı sheshiledi - Úkimet jaýaby
«Jaıyq ózeniniń ekologııalyq jaǵdaıy Úkimettiń erekshe baqylaýynda. Sońǵy jyldary jaýyn-shashyn kóleminiń azdyǵyna baılanysty Jaıyqtyń jaǵdaıy qıyndap barady. Sondaı-aq, Saǵyz, Oıyl, Jem ózenderiniń sýy da tartylyp barady. Osy oraıda atalǵan máseleni sheshý úshin tıisti sharalar qabyldanady», - dep jaýap qatty Roman Sklıar Jaıyq ózeniniń taǵdyryna qatysty depýtattyq saýalǵa.
Úkimet basshysynyń orynbasary Jaıyq ózenin erekshe memlekettik qorǵaýǵa alýǵa qatysty pikir bildirdi.
«Sońǵy ýaqytta Jaıyq ózenin memlekettiń erekshe qorǵaýyna alý máselesi jıi qozǵalyp júr. Osy tusta ózenniń negizgi aǵysy Jaıyqtyń joǵary bóliginde, ıaǵnı Reseı Federatsııasy jaǵyna tıesili ekenin aıtyp ótken jón. Jaıyq ózeni basseınindegi sý sharýashylyǵy salasyn úılestirý 1996 jylǵy 20 maýsymdaǵy transshekaralyq sý nysandaryn qoldaný jáne qorǵaý týraly ortaq hattamaǵa sáıkes anyqtalǵan. 50% qamtamasyz etý – 7,79 tekshe metr, 75% qamtý – 5,360 tekshe metr jáne 95% qamtamasyz etý – 2,97 tekshe metr», - deıdi ol.
Depýtattyq saýalǵa berilgen jaýapta aıtylǵandaı, 2017-2020 jyldary Jaıyq ózeniniń jyldyq aǵysy 10,6 tekshe metrden 4,5 tekshe metrge deıin azaıǵan.
«Soǵan qaramastan Jaıyq ózeniniń jyl saıynǵy sýdyń jınalýy 0,5 tekshe metrdi quraıdy. Sondyqtan da Jaıyq ózenin erekshe memlekettik qorǵaýǵa alý máselesi Reseımen ekijaqty qarastyrylyp jatyr. Al ózenniń sý sharýashylyq jaǵdaıy men ekologııalyq júıesin sheshý Qazaqstan-Reseı arasyndaǵy 2021-2024 jyldarǵa arnalǵan transshekaralyq sý nysandaryn qoldaný jáne qorǵaý týraly yntymaqtastyq baǵdarlamasy aıasynda sheshiledi», - dedi R.Sklıar.