Jaıyq ózeninde katerler soqtyǵysynan jaraqat alǵan 6 jasar balaǵa ota jasaldy
Atyraý oblystyq balalar aýrýhanasynyń dırektory Nurǵabyl Aıtmuhambetovtiń aıtýynsha, zardap shekken balanyń basyna kúrdeli ota jasalǵan.
«Balanyń basynan jasalǵan kúrdeli ota sátti ótti. Qazir naýqastyń jaǵdaıy jaqsaryp keledi. Naýqas jansaqtaý bóliminen travmatologııa bóliminiń palatasyna aýystyryldy», -dep habarlady Nurǵabyl Aıtmuhambetov.
Eske sala ketelik, buǵan deıin Jaıyq ózeninde eki kater soqtyǵysyp, 9 adam aýrýhanaǵa túskenin jazǵan bolatynbyz.
Polıtsııa departamentiniń málimetinshe, Jaıyq ózeninde soqtyǵysqan qaıyqtar adamdardy serýendetý qyzmetine paıdalanylǵan. Sý kóliginiń birinde 10 adam, al ekinshi qaıyqta 25 adam bolǵan.
Oqıǵa saldarynan zardap shekkenderdiń arasynda 5 eresek adam bolǵan. Al kámeletke tolmaǵan 4 bala oblystyq balalar aýrýhanasyna túsken. Onyń ishinde 6 jasar bala jansaqtaý bóliminde jatyr.
Polıtsııa qyzmetkerleri atalǵan oqıǵaǵa baılanysty QR Qylmystyq kodeksiniń 344-baby 1-bóligimen (Temirjol, áýe, teńiz nemese ózen kóligi júrisi nemese olardy paıdalaný qaýipsizdigi qaǵıdalaryn buzý) sotqa deıingi tergeý amaldaryn júrgizip jatyr.
Keıin Atyraý oblystyq densaýlyq saqtaý basqarmasy basshysynyń orynbasary Almagúl Ábilovanyń aıtýynsha, zardap shekkenderdiń jaǵdaıy týraly aıtyp berdi.
«Atyraý oblystyq aýrýhanasyna medıtsınalyq kómek alý úshin 3 naýqas júgindi. Onyń 2-eýi ambýlatorly em qabyldaýǵa úıine jiberildi. Aýrýhananyń lor bóliminde 1 adam em qabyldap jatyr. Al, oblystyq balalar aýrýhanasyna 4 bala jetkizildi. Dárigerlerdiń tekserýinen soń 1 bala ambýlatorly em-dom qabyldaý úshin úıine shyǵaryldy. Aýrýhananyń jansaqtaý bólimine túsken 2017 jylǵy naýqastyń jaǵdaıy aýyr kúıinde qalyp otyr. Al, 2009, 2007 jylǵy jasóspirimder ár túrli dene jaraqatyn alǵan», -dep habarlady Almagúl Ábilova.